Voluntary Blood Donation Day hmang

Mizoram State AIDS Control Society MSACS), Association for Voluntary Blood Donation (AVBD) leh T Romana College-te huaihawtin, nimin khan T Romana College-ah National Voluntary Blood Donation Day hman a ni a, AVBD adviser Lalbiakthanga Pachuau khuallian a ni.

Inkhawm hi MSACS project director Dr Lalmalsawmi Sailo-in a kaihruai a; khuallian Lalbiak-thanga Pachuau chuan, tun hnaia a thlawna thisen pek a tlahniam tih sawiin, Mizo ṭhalaite chu thisen pek kawnga ṭan la lehzual turin a sáwm a, thisen pe thei tura nun uluk turin a chah.

Lalbiakthanga Pachuau chuan, thisen mamawh-tu an pun zel avangin thisen pek zel a ngaih thu a sawi a; mi nunna chhanna atana thisen pek chu mihringin a pek theih thilpek hlu ber a nih thu sawiin, thisen pek uar zel turin Mizo mipui a chah a ni.

AVBD general secretary C Lalnunnema'n report a pe a; AVBD ngen angin, Mizoram sorkarin sorkar hnathawkte chu thisen an pek ní-ah special casual leave an lak a phalsak a, special casual leave chuan casual leave leh earned leave a lâk hêk loh thu a sawi. T Romana College principal mawhphurhna la mektu Dr Lalchhuanmawii'n thu a sawi bawk.

National Voluntary Blood Donation Day pual hian blood donation camp huaihawt nghal a ni a; T Romana College-a first semester zirlaite'n thisen an pe. Aizawl Civil Hospital tan zirlai mipa 63 leh hmeichhia 15-te'n thisen unit 78 an pe a ni.

National Voluntary Blood Donation Day hi India ramah kum National Blood Transfusion Coun-cil (NBTC) leh Natio-nal AIDS Control Organi-sation bultumin October 1, 1975-ah hman ṭan niin, kum tin han ṭhin a ni a; kuminah Inrinni a nih avangin Mizoramah chuan nimin khan hman a ni.