YMA hruaitute'n ruihhlo do sawiho

Central YMA chuan nimin khan CYMA Hall-ah Aizawl khawpuia YMA branch hruaitute intawhkhawmna an buatsaih a, ruihhlo do chungchang an sawiho.

Central YMA president Lalbiakzuala chuan, ruihhlo chu ram leh hnam hmelma tih YMA-in a hria tchian avangin a do tih sawiin, "A kalkawng a bumboh emaw, thenfai ngai a tam emaw, ram leh hnam hmangaihna rilru kan put phawt chuan kan hlawhtling ngei ang. Huat leh ngei kan hlawh cháng a awm thei a, mahse, ruihhlo kan do chhan hriat reng a pawimawh," a ti.

Ṭhahnemngai takin ruihhlo hi do ni mah se, a hluar telh telh avanga inkokhawm an nih thu sawiin CYMA President chuan, "Beihpui thlak a ngai a ni. Kan fateah ruihhloin bu a khuar lo a ni mai thei, mahse, kan khawtlang nun a tihbuai avangin ṭanrual a ngai a ni," a ti a; ruihhlo vanga mangangte'n YMA member-te an koh thu a sawi.

CYMA general secretary Lalhmachhuana tarlan danin, January-September 2016 inkarah ruihhlo hman sual avangin mi 49 an thi tawh a, tun hnai kum 10 chhunga ruihhlo vanga nunna chán an tam ber ṭum a ni.

Inkhawm hi CYMA vice president Vanlalruata'n a kaihruai a, CYMA treasurer Lalngheta'n 'Ruihhlo do chungchanga YMA hmalakna' tih a sawi.