Zorama'n President leh PM lehkha a thawn

MNF president Zoramthanga chuan September 22, 2016-a Lunglei Zohnuai mipuiin Lunglei District Court an khawih leh judicial quarters an suasam chungchangah nimin khan President Pranab Mukherjee leh prime minister Narendra Modi hnenah lehkha a thawn a; dan leh thupek a hlawhchham avangin a rang thei ang bera Mizoram tana ṭha tura hma laksak turin a ngen.

Zoramthanga hian a lehkhaah hian, Mizoramah hmasawnna duhawm tak hmuh tur a awm mek laiin, September 22, 2016-ah Lunglei District Court building leh judicial quarters-te mipui lungawi loin an bei thu leh, a beitute chuan dodalna mumal tak hmachhawn loin rorelna an kuta an ken thu a ziak a ni.

MNF President chuan, thil thleng duhawm lo tak avangin Gauhati High Court-in Lungleia Judicial officer zawng zawngte a hnuhkir (withdraw) thu te, Gauhati High Court Chief Justice Ajit Singh-a'n Mizoram Chief Minister hnenah lehkha na takin a ziak a, thil thleng chu engti zawng maha hriatthiam theih a nih loh thu leh dan leh thupek a hlawhchham let dêr tih a ziah thute a tarlang.

Zoramthanga chuan, "Hetianga Judiciary a tlusawp hial hian ram danpui a sâwi nghîng a, dan leh thupek a hlawhchham avang hian a rang thei ang bera kan tana ṭha tur action laksak turin ka ngen che a ni," tiin, President leh Prime Minister te chu a ngen a ni. Lehkha copy hi Governor Lt. Gen. Nirbhay Sharma pek a ni bawk.

Hetih lai hian, MNF Sub-Headquar­ters, Lunglei president Lawmawma Tochhawng leh hruaitu dangte chuan Lunglei Court beih a nih dan chhuitu, Magisterial Enquiry officer Kanand Gopinathan, Aizawl DC chu nimin khan Lunglei Circuit House-ah hmuin lehkha an thehlut a; Zohnuai khawtlang chungah zangngaihna sang ber lantir turin an ngen.

Magisterial Enquiry hnenah hian sawi duh neite'n thu thlen theih a nih angin, Lunglei MNF hruaitute chuan ziakin thu an thlen a ni. An lehkhaah chuan, Mizoram sorkarin a hun takah hma la se chuan thil thleng chu pumpelh theih nia an hriat thu te, mipui leh police innawr tawh hnua Lunglei District Magistrate-in Home department-a thu a thawn/thlen chu Home department aṭangin chhanna a hmuh mai loh vangin thil pawi zawk a thlen thu te, Zohnuai mipuite lakah ngaihdamna sang ber lantir ni se an duh thu te, Lungleia Judicial officer sawn chhuahte dah lêt leh thuai a ṭul thute an ziak a ni.