KHAWTHLIR
Motor 11 man
Aizawl traffic police-te leh Aizawl District Anti Tobacco Squad-te chuan, nimin khan Chanmari kawng hnuai leh New Market inkarah joint drive an nei a, mihring phur chi sumdawnna lirtheiah mei zu an awm leh awm loh an enfiah. Dan bawhchhia motor 11, (taxi pasarih leh maxicab pali) an man a, pawisa an chawitir a ni.
Gas bur 33 man
Central YMA leh Mizoram police-te ṭang dun chuan September 29, 2016 zan khan Mualkhang, Khamrang leh a chhehvelah gas (LPG) khawih chingpen an vâi a; truck NL-04 D-2443 a gas khawih chingpen lai an tlanbosan aṭang leh mi ṭhenkhat dan loa gas zuar chhawngtute aṭangin gas bûr 33 an man. Dan loa gas khawih chingpentute hi police-in thubuai an siamsak a ni.
LC bye-election
State Election Commission chuan, Dawrpui Vengthar Local Council member pakhat a thih vanga a hmun ruak hnawhkhahna atan October 31, 2016-ah bye-election a buatsaih dawn.
Thisen pe
Baptist Higher Secondary School, Serkawn NSS unit-te chuan nimin khan Christian Hospital, Serkawn tan thisen unit 72 an pe a, a petute zirtirtu panga, mipa 52 leh hmeichhia 15 an ni. Mualṭhuam North biak ṬKP pawhin Lunglei Civil Hospital tan unit 66 an pe a, a petute mipa 49 leh hmeichhia 17 an ni. Chanmari West Hmarveng Branch KṬP member mipa 46 leh hmeichhia pahnihte'n Aizawl Civil Hospital tan unit 48 an pe bawk.
Bank hawng
Phullena Mizoram Rural Bank branch thar chu nimin khan minister Lal Thanzara'n a hawng. Lal Thanzara chuan, Aizawl khawpui leh Mizoram pumpuiah bank thar tam tak hawn a ni mek zel tih sawiin, "Hei hian Mizoramah sum léngvâk a tam tih a tilang," a ti. Phullena MRB branch hi Mizorama branch 79-na a ni.