Mizoramin AMRUT Award a dawng

Mizoram chuan nimin khan New Delhi-a INDO-SAN 2016-ah AMRUT Reforms Award a dawng a, award hian cheng nuai 163 a keng.

Award hi Mizoram sorkar aiawhin parliamentary secretary (UDPA) Hmingdailova Khiangte-in Union minister for Urban Developoment Venkaiah Naidu hnen aṭangin a dawng.

Award dawn chungchangah hian UDPA minister Zodintluanga chuan, “Mizoramin India ram state lian tam tak zingah sorkar laipui aṭanga award a dawng ve leh ṭhin chu thawktute thawhrimna leh thawhhona ṭha neih vang a nih bakah, CM Lal Thanhawla'n min tuipui vang a ni," a ti.

Zodintluanga chuan, Aizawl Municipal Corporation chu hna thawk thei turin Mizoram sorkarin hna a pek belh zel thu sawiin, "Municipality tana Constitution-in a sawi 18 functions pawh tun hnaiah sorkarin AMC thawh turin a hlan kim a, sorkar laipuiin tih tur min tukte Mizoramin sorkarin a tihlawhtling a, hma kan sawn phah a ni,” a ti.

Reforms Incentive Award dawng turin tihhlawhtlin ngai aṭanga teha mark 70% mark hmu chinte'n award an hmu thei a, Mizoramin mark 75% a hmuh thu leh, hmarchhak state-a a dawttu Tripura-in 71% a hmuh thu a sawi bawk.

Sorkar aiawha AMRUT Reforms Award dawngtu parliamentary secretary Hmingdailova Khiangte pawhin, “UDPA-a thawktu hrang hrangte thawhrimna leh thawhhona a fakawm a, Chief Minister leh Minister chak tak hnuaiah nasa takin hna an thawk a, hei hi Mizoramin lawmman kan hmuh chhan bul a ni,” a ti.

AMRUT Reforms hi financial year tinah tihhlawhtlin tur a awm a, kum 2016-17 chhunga tihhlawhtlin tur Central-in state tinte a tuk a ni. India ram state zinga tihlawhtlingte chu nakkumah pawh mark score tur zat an score tlin chuan award an dawng leh dawn niin an sawi.

New Delhi-a AMRUT Reforms Incentive Award dawnnaah hian Hmingdailova Khiangte hi UDPA director Zorammuana leh official dangte'n an ṭawiawm a ni.