MISSTA-in khawmpui hmang

Mizoram Secondary School Teachers Association (MISSTA) chuan, nimin khan Synod Conference Centre-ah Annual General Conference an hmang a; khuallian, parliamentary secretary (Education) Joseph Lalhimpuia chuan, high school headmaster recruitment rules thar peih thuai tum a nih thu a sawi.

Joseph Lalhimpuia chuan, high school atana science leh mathematics zirtirtu lakna tur recruitment rules hran siam a nih hnuah, science leh mathematics zirtirtu indaih lohna phuhru turin zirtirtu 111 lakna tur buaipui mek a nih thu a sawi a, "Rei lo têah zirtirtu thar lakna tur peih a nih beisei a ni," a ti.

Zirna chu ram hmasawnna zawng zawng ṭo-bul a nih thu sawiin Lalhimpuia chuan, "Zirna hi hriselna leh kan ram leh khawltang nun min siam danglamtu a ni," a ti a; zirnaa hlawhtlinna atana pawimawh ber chu zirtirtuin an hriatna leh thiamna naupangte hnena an hlan chhawn a nih thu a sawi.

MISSTA inkhawmpui hi an vice president Zorammawia'n a kaihruai a; an president K Za-tluanga chuan, office-a thawk tam takin zirtirtute chu office kalphung hre lo, hlawh siam dan leh basic pay pawh hre lo an tih fo chhan chu, sikulah zirlaite hmakhaw ngaia zirtirna hna an thawh nasat vang a nih thu a sawi.