Sorkar laipui scheme thlirho

Kolasib District Development Coordination and Monitoring Commit-tee (DISHA) chu nimin khan an chairman CL Ruala, Lok Sabha MP hoin DC conference hall-ah an ṭhukhawm a, sor-kar laipui scheme hnuaia hmalaknate an thlirho.

Meeting-a tarlan dan-in, Kolasib district-ah hian kum 2016-17 chhung-in Swachh Bharat Mission (Gramin) hnuaia thingtlang khuaa in tinin ek-in an neihna tur Individual Household Latrine (IHHL) hnuaiah ek-in sak ngai 641 aṭangin 394 sak zawh tawh a ni a, khaw 32-a ek-in thianghlim tawk lo 1,225 sak ṭhatna tur buaipui mek a ni.

Khaw tinah kawlphetha pek a nih theih nana duan Deendayal Upadhyaya Gram Jyoti Yojana (DDUGJY) hnuaiah Dilzau H, Sakeihmun leh Zaihrikawn-ahte electric power pek tura ruahman mek a ni a; heng khuate pek zawh a nih chuan Kolasib district-a khaw tinah electric power a lut kim tawh ang.

SSA hnuaiah kum 2016-17 atan naupang 9,767 hnenah school uniform leh naupang 12,751 hnenah zirlaibu sem a ni a; midday meal hnuaiah sikul pathum - Shalom UPS, Kolasib, Tuiṭhaveng UPS leh Kawnpui Kanaan UPS-ahte choka sak mek a ni.

Committee hi MP, MLA leh V/C-te'n thawhhona ṭha zawk nena sor-kar laipui scheme ṭha taka kalpui a nih theih nana enthlithlai tura din a ni a; nimina meeting-ah hian Kolasib district-a MLA pahnih PC Zoram Sang-liana leh K Lalrinthanga te pawh an tel.