Mizoram Police leh SBI-in MoU an ziak

Mizoram Police leh State Bank of India (SBI)-te chuan, nimin khan Police headquarters-a Arya Mess-ah Police Salary Package (PSP) atan inremna thuthlung, Memorandum of Under-standing an ziak a; parliamentary secretary (Home) Lt.Col. ZS Zuala'n a hmanpui.

Lt.Col. ZS Zuala chuan, Mizorama bank rinkai berte zinga mi SBI leh Mizoram Police-in thuthlung an ziak chu lawmawm a tih thu sawiin, "Mizoram police-te tan hamṭhatna tam tak a thlen ngei ka beisei. Police-te tan an hna hian an nunna tan a hlauhawm thei tam tak a keng tel a, he PSP hian chetsualnaa nunna hlohte tan pawisa hmuh theihna accidental insurance cover a keng tel hi a lawmawm hle a ni," a ti.

MoU-ah hian Mizoram Police aiawhin IGP Zorammawia'n hming a ziak a, SBI aiawhin general manager (NW-II) Panna Lal Das-a'n a ziak thung.

Police zingah constable aṭanga SP inkarte chuan PSP an zawm chuan chetsual vanga an thih palh chuan Rs. 5,00,000 thleng an hmu thei dawn a, DIG aṭanga DGP inkarte'n Rs. 10,00,000 thleng an hmu thei dawn. Thlawhtheihnaa chesuala thi DSP leh additional SP-te'n Rs. 5,00,000, SP leh senior SP-te'n Rs. 15,00,000 leh DIG chin chung lamin Rs. 25,00,000 an hmu thei ang. Heng bakah hian, hamṭhatna dang eng emaw zat a awm.