April 30 thleng inkhârkhip a ni dawn Kalphung tur SLTF duan tura tih a n

Chief minister Zoramthanga hoa nimina Assembly Speaker, minister, sorkar offi cial, tlawmngai pawl, kohhran, doctor, zirlai pawl, village council leh local council pawl hruaitute Assembly Annexe conference hall-a ṭhukhawm chuan, inkhârkhip kalpui mek chu April 30, 2020 thleng pawhsei an rêl. Inkharkhip kalpui zel dan tur chu Chief Secretary kaihhruai State Level Task Force (SLTF) duan turin an dah.

CM Zoramthanga chuan, nimin zinga Council of Ministers ṭhukhawmin April 30 thleng inkhârkhip pawhsei ṭha a tih thu sawiin, "Thutlukna erawh he meeting-in kan siam tur a ni. Ram chhungah chuan inhriatthiam ngaihn a deuh a awm a, ramri kan vên ṭhat chuan Mizoram chu kan ṭha. Theihtawpin ramri vên a ni ang," a ti.

Meeting-ah hian Health minister Dr R Lalthangliana, Home leh DMR minister Lalchamliana, Supply minister K Lalrinliana, IPR leh Rural Development minister Lalruatkima ten an department chan ṭheuha an hmalaknate an sawi.

Health Minister chuan, Mizorama Covid-19 kai awmchhun chu ram dang aṭanga kai ni mah se, fimkhur a ngaih thu a sawi a, "Assam-ah a léng nasa a, Bangladesh-ah kai mi 631 an awm. Kan health infrastructure a chhia a, hmalakna tam tak kan nei tawh a, neih zel turte pawh a awm. Tih vut vut theih lohte a awm bawk," a ti. Thu sawitu tam zawk chuan inkhârkhip chu tlema thlahdul hret an duh a, ni tina eizawngte tan tlema inthlahdul deuh an duh hlawm a ni. Sawiho zawh hnuah Chief Minister chuan, Covid-19 luhna remchang siam loh tur a nih thu sawiin, "Kan ṭhenawmah a nasa tawh a, vèn uluk a ngai. Hnathawh mamawhzual an awm, chungte tan chuan hun hawnsak a pawimawh," a ti.

Zoramthanga chuan, Covid-19 dona atana CM Relief Fund-a sum lutte chu langtlang taka hman a nih thu sawiin, "Bial neiin a enkawl hna an thawh chuan inthîknate a awm duh. Chuvangin, a hman dan tur pawh bial nei ve lo Chief Secretary kaihhruaiin an rêl a ni," a ti a; Committee rel ang thlapin CM Relief Fund-a sum lutte sem a nih thu a sawi. Chief Minister chuan, ṭhenawm state-a Mizo tangkhangte chu Mizorama an haw theih dan ngaihtuah a nih dawn thu sawiin, "Rél leh thlawhtheihna hmanga rawn luh ngaite chu tihngaihna a awm rih lo. Mahse, chu'ng mite chu puih an ngaihnaah puih kan tum. Mizoram House-a awmte chu chaw ei man leh thlen man laksak lo turin kan ti. Theih ang angin kan pui zel ang," a ti.

Covid-19 a lo luh thut avangi n sum lamah India ram a indap chawp zel tih sawiin Zoramthanga chuan, "Keini pawh kan indap chawp zel. A bupui ber chu Finance department lamin an ti ang a, DMR, LESDE, FCSCA leh Health department lam aṭanga chhûn khawmte pawh a awm," a ti a; sum hman chur chur tur awm lo mah se, mualpho loa kal theihna khawp a awm thu a sawi. Meeting chuan inkharkhip April 30 thleng pawhsei an rêl a; a kalphung duangtu tur State Level Task Force chu district leh local level task force-te ráwn tur te, mipui harsat lutuk loh dan tur ngaihtuah tur leh meeting-a thusawite ngaihtuah tel tura tih an ni.

• Ramri ngawrh leh zuala vèn a, a tam thei ang force dah.

• Village/local task force-te ngaihtuah leh zual, a bik takin ramri hrûla duty-te

• Hna thawh tur a awm rih loh avangin force ni kher lo pawh ramri veng turin sorkar hnathawk hman.

• Langtlang zawka CM Relief Fund hman dan kalpui a, a area azira sum pek zat tur ruahman.

• Sorkar hnathawk hlawh Covid-19 do nan pawhhêk ṭhen.

• HSSLC exam hmabak la neite tana exam buatsaih vat.

• Inkhârkhip chu a inang pûta Mizoram pumah kengkawh lo a, zone-a ṭhenin, dinhmun azira kharkhipna tihkhauh.

• Ramri vènnaah BSF-te'n Mizo  ram sorkar a thawhpui ṭhat laiin Assam Rifle-te'n an thawhpui ṭha lo.