KHAWTHLIR

AVBD ngenna anga KṬP, Mission Veng Branch-in an veng chhunga thisen pe tur ṭhalai an zawn khawm mipa 27 leh hmeichhia pakhatte chuan nimin khan Aizawl Civil Hospital-ah thisen unit 28 an pe a, individual donor mi 31 an awm bawk. St. John's Higher Secondary School NSSte'n Kolasib District Hospital-ah thisen unit 17 pein, petute mipa 15 leh hmeichhia pahnih an ni a; Region HSS, Lawngtlai NSS-te'n Lawngtlai District Hospital-ah thisen unit 15 an pe a, petute mipa 10 leh hmeichhia panga an ni. 

Nimin zing dar 7 vel khan Sairang Dinthar leh Mualkhang inrina Tlawng lui, Durlui chhuahah hmeichhe ruang chhar a ni a, nimin vêk khan Lalrinengi (44) w/o Lalrinmawia, Sairang Vengthar a ni tih hriat a ni. Lalrinengi hi April 9, 2020 khan chengkawl khawrh turin luiah a kal a, a haw tâk loh avangin a chhungte chuan an lo zawng ru reng tawh a ni. 

Neihloh Branch YMA duty-te chuan April 12, Pathianni khan Tlawng lui an humhalh laia dynamo leh chinai hmanga sangha vuak tum mi 13 an man a, an hmanruate an chhuhsak nghal; sangha vuak tumtute hi Aizawl, Saitual leh Sertlangpui mite an ni. Neihloh YMA chuan, an eizawnna ber zah lo taka suasam a ni chu pawi an tih thu an tarlang. 

Mizoram sorkar chuan Covid-19 chungchanga hmalakna atan nimin khan task group pahnih a din belh leh. Group din thar - Task Group on Commodities-ah chairman atan FCSCA secretary HL Rochungnunga leh secretary atan FCSCA director Dr Lalhriatzuali Ralte ruat an ni a; Task Group on Quarantine Facilities-ah chairman atan School Education secretary Esther Lalruatkimi leh secretary atan HFW-a state leprosy officer Dr Chawngthanchhunga ruat an ni. 

Serchip DC Dr Lalzirmawia Chhangte chuan nimin khan Serchhip district-a bank hrang hrang aiawhte ko khawmin, Covid-19 hri léng vanga mipui harsatna sutkianna tura sorkar aṭanga ham- ṭhatna dawn turte mipuiin an dawn thuai theih dan tur a sawipui. DC chuan, ATM booth awm lohna khuate'n pawisa an lâk chhuah theih dan tur ngaihtuahsak turin bank hotute a chah.