Mizoramah Faina Hapta hmang tan Sorkar hotuten Mahatma Gandhi limah pangpar dah

Nimin October 2 kha India hnampa, Mahatma Gandhi pian champha a ni a, amah hriatrengna leh zahna lantir nan nimin zing dar 7:30 khan sorkar hotu liante'n Zodin Square-a Mahatma Gandhi limah pang-par an dah. Mahatma Gandhi pian champha aṭanga hman ṭhin Faina Hapta pawh Mizoram hmun hrang hrangah hman ṭan a ni.

Nimin zinga India Hnampa zawhna lantirnaah hian Governor Lt.Gen. Nir-bhay Sharma-a'n pangpar dah hmasa berin, chief minister Lal Thanhawla'n a dawt a; a hnuah Legislative Assembly speaker Hiphei, Home minister R Lalzirliana, minister dang te, parliamentary secretary-te leh MLA te, Chief Secretary, DGP leh sorkar officer dangte'n zahna pangpar an dah a ni.

October 2 hi Pathianni a nih avangin, Mahatma Gandhi pian chanpha aṭanga hman ṭhin Faina Hapta chu October 1, Inrinni khan district khawpui hrang hrang-ah hawn a ni.

Lungleiah chuan MIZO-FED dawr kawtah PHE supe-rintending engineer H Duhkima hoa hawn a ni a; H Duhkima chuan, Mizoramah Faina Hapta ṭhangkhat lian zet kalpui a ni tawh tih sawiin, "Hei vang hian Mizote kan hrisel chhoin, kan dam hun chhung pawh a sei phah a ni. Suma lei theih loh hriselna hi ram hmasawnna atana innghahna lungphûm chu a ni," a ti. Faina Hapta hman chhung hian anganwadi, sikul, veng leh office hrang hrangte fai kawnga inelna buatsaih a ni ang.

Lawngtlaiah chuan Faina Hapta hi Areopagy-ah Lawngtlai DC Dr A Muthamman-a'n a hawng. Bawrhsap chuan, Mizoram chu India rama state fai berte zinga mi a nih thu leh faina kawnga mipui rilru sûkthlêk pawh a dik viaua a hriat thu a sawi.

Faina Hapta pual hian Lawngtlaiah hian middle school leh high school naupangte tan lem inziahsiak (painting competition) leh, higher secondary school leh college zirlaite tan thu inziahsiak (essay writing competition) buatsaih tum a ni.

Serchhipah chuan DC pisa tualah hawn a ni a, additional DC VL Remliana'n a hawng.

VL Remliana chuan, Serchhip chu khaw fai tak nia a hriat thu sawiin, "Mahni in leh a chhehvel tifai lai hmuh tur an awm reng mai hi an fakawm hle. Faina Hapta hi kan fai reng ṭhin tawhna chawi nung zel tura inpek tharna hun a tan hman ni se a duhawm hle," a ti.

Serchhipa Faina Hapta pual hian zirna in leh pisa zawng zawngte tan inelna buatsaih a ni a; taxi stand, auto-rickshaw stand-te leh sumo stand-te tifai tura ngen an ni.

Faina Hapta hi India Hnampa, Mahatma Gandhi pian champha October 2 aṭanga October 7 inkara hman ṭhin a ni.