MNF-in stamp duty ennawn an phût
MNF party chuan, Mizoram sorkarin The Indian Stamp (Mizoram Amendment) Act 2016 Rules hmanga in hmun lei leh inhlan chhâwnnaa stamp duty leh chawi tur dangte a tihpun dan chu a sang lutuk tih sawiin, sûta ennawn leh turin sorkar an phût.
MNF Vigilance department aiawhin MNF general secretary L Thangmawia chuan Inrinni khan Aizawl Press Club-ah thuthar thehdarhtute kâwmin, stamp fee tihsan a nih chungchang a sawi a, "A rang thei ang bera stamp duty leh registration fee hi ennawn a, tihniam turin sorkar kan phût a, hmalakna a taka hmuh tur a awm loh chuan mi retheite thlavâng hauhin tihhniam a nih hma chuan a ṭul angin hma kan la zel dawn," a ti.
L Thangmawia sawi danin, Council of Ministers-in September 21, 2016-ah The Indian Stamp (Mizoram Amendment) Act 2016 Draft Rule an pawm a; August 9, 2016-a notification tihchhuahah chuan, stamp duty rate tihpun chu September 1, 2016-a hman ṭan tur a ni. District lamin notification an hmuh loh avangin an hmang mai lo a, September chawlhkar thumna aṭangin hman ṭan a ni. Dan thar hman hma chuan stamp duty chu in hmun hlutna aṭanga lak niin, Rs. 500 aia tam lak a ni ngai lo.
Dan thar ang chuan, in hmun chu inpek a nih chuan a hlutna
aṭanga 2% stamp duty atan chawi tur a ni. In hmun zau zawng (square meter-a chhûtin) leh grade value puntir chhuak chu a hlutna (land value)-a ngaih a ni a, chuta ṭanga 2% chu stamp duty zat tur a ni. Aizawla Grade-I chhunga in hmun sq.m. 100 atana stamp duty chawi ngai zat chu Rs. 60,000 tihna a ni (2% of 100 X Rs. 30,000 = Rs. 60,000).
In hmun chu lei a nih chuan a man zat aṭanga 2% stamp duty-ah chawi tur a ni a, cheng nuai 50 man in hmunah chuan hming thlak dawnin stamp duty-ah Rs. 1,00,000 sorkara chhûn luh a ngai dawn. In hmun chu loan lâk nana dahkham a nih chuan loan lak zat aṭangin 2% chawi tur a ni a, loan cheng nuai 50 la tan Rs. 1,00,000 chawi a ngai dawn a ni.
L Thangmawia chuan, in hmun hlut zawng chu Valuation Commitee bithliah tura tih a nih laiin, Commitee din a la ni lo tih a sawi a, "A hmun azirin grade hrang hranga ṭhenin stamp duty hi chhût a ni mek," a ti. In hmun neitu hming thlak turin stamp duty bakah, dan hluia registration fee Rs. 5,000 aia tam lo lak ṭhin chu dan thar hnuaiah Rs. 30,000 aia tam lo tura tihsan a nih thu a sawi.
Registration fee atan hian in hmun chu pek a nih chuan a hlutna aṭanga 0.5% chawi tur a ni a; Aizawla Grade-I chhunga in hmun sq.m. 100 atana registration fee chawi ngai zat chu Rs. 15,000 (0.5% of 100 X Rs. 30,000 = Rs 15,000) tihna a ni. In hmun chu lei a nih chuan a man aṭangin 0.5% chawi tur a ni a, cheng nuai 50 man in hmunah hming thlak dawnin registration fee Rs. 25,000 chawi a ngai dawn. In hmun chu loan lak nana dahkham a nihin loan lak zat aṭangin 0.5% chawi tur a ni a. loan cheng nuai 50 lâkin Rs. 25,000 chawi a ngai tihna a ni.
Stamp duty leh registration fee bakah, chawi ngai dang Rs. 260 a la awm a; chungte chu original LSC atan Rs. 50, duplicate LSC atan Rs. 30, NoC atan Rs. 20, NEC atan Rs. 20, LVC atan Rs. 20, mapping atan Rs 20 leh printing charge Rs. 100-te a ni.
L Thangmawia chuan, Aizawla Grade-I chhunga in hmun sq.m. 100 atana hming thlak leh a kaihhnawiha sen ngai zawng zawng chu Rs. 75,260 a nih thu leh, cheng nuai 50 man in hmun lei tan Rs. 1,25,260 chawi a ngaih thu a sawi a; "Stamp duty punna hi a maka maka tam a ni a, mipui chhiah chawi tihsan tawhah hetiang em ema vawi khata tihpun nasat hi a awm kan la hre ngai lo a, world record a nih kan ring," a ti.
MNF General Secretary chuan, sorkar chu leiman leh chhiah chi hrang hrang uchuak taka tisang a, chintâwk awm loa miretheite sáwrfû zawnga kalah sorkar a puh a; a rang thei ang bera stamp duty leh registration fee ennawn a, tihniam turin sorkar an phût tih a sawi.
Stamp duty pun dan (MNF chhût dan)
In hmun man Rate thar Rate hlui Punna Punna
In hmun hlutna Za zelah
Rs. 1,00,000 Rs. 100 Rs. 2,000 Rs. 1,900 1900%
Rs. 5,00,000 Rs. 250 Rs. 10,000 Rs. 9,750 3900%
Rs. 10,00,000 Rs. 500 Rs. 20,000 Rs. 19,500 3900%
Rs. 15,00,000 Rs. 500 Rs. 30,000 Rs. 29,500 5900%
Rs. 20,00,000 Rs. 500 Rs. 40,000 Rs. 39,500 7900%
Rs. 25,00,000 Rs. 500 Rs. 50,000 Rs. 49,500 9900%
Rs. 30,00,000 Rs. 500 Rs. 60,000 Rs. 59,500 11500%
Rs. 35,00,000 Rs. 500 Rs. 70,000 Rs. 69,500 13900%
Rs. 40,00,000 Rs. 500 Rs. 80,000 Rs. 79,500 15900%
Rs. 45,00,000 Rs. 500 Rs. 90,000 Rs. 89,500 17900%
Rs. 50,00,000 Rs. 500 Rs. 1,00,000 Rs. 99,500 19900%