Hmun hrang hrangah Upate Ni hman a ni

October 1, Inrinni kha World Old Age Day a ni a, Mizoram hmun hrang hrangah hman a ni a, sorkar mi pawimawhte pawhin an hmanpui.

Lungleiah chuan Upate Ni hi Mizo Upa Pawl (MUP) hqrs. Lunglei buatsaihin Saikuti Hall-ah hman a ni a, Social Welfare minister PC Lal-thanliana'n a hmanpui. Minister chuan, upate chu an upat vanga châwl hman an ni lo tih sawiin, "Chhungkua, khawtlang leh ram tan tih tur tam tak in la nei a ni," a ti.

PC Lalthanliana chuan, Mizoramin upate ham-
ṭhatna tur dan fel tak a nei tih sawiin, "The Mizoram Maintenance and Welfare of Parents and Senior Citizens Rules, 2013 chu July 30, 2014-a pass a ni," a ti a; he dan hmang hian sorkarin upate tan hma a la mek tih a sawi.

Minister Lal Thanzara chuan Upate Ni-ah hian Electric Veng MUP Rûn sak thar a hawn bakah, Chanmari leh Chanmari West-ah Upat Ni puala inkhawm buatsaih a hmanpui.

Lal Thanzara chuan, tunlai khawvel hi ṭhalaite khawvel tia sawi theih hial ni tawh mah se, upate chu khawtlang, kohhran leh sorkarah ṭangkaina tam tak an nei tih a sawi a, "Upate tawnhriat
aṭang tein naupang zawkte'n zir tur tam tak kan nei. Sorkar pawhin upate pawimawhna hriain committee hrang hrangah MUP-te telh an ni," a ti.

Mizoramin MUP a nei chu vanneihthlak a tih thu sawiin Lal Than-zara chuan, "Ram changkang zawkah chuan an mi-thiamte'n mihring nun pumpui an zirchian hnuin, mihring nunah upat hun ngaih pawimawh a
ṭulzia an hmuchhuak a, upate chu intelkhawma, kawng hrang hranga an ṭangkainate an hmuchhuak a ni," a ti a; upate pawimawhna hre lo an tam ve tial tial chu pawi a tih thu a sawi.

North Vanlaiphai Veng-lai MUP pawhin Upate Ni pualin Prima-ry School-II ah inkhawm an buatsaih a, Mizoram State Women Commission chairperson Vanlalawmpuii Chawng-thu, MLA-in a hmanpui.

Vanlalawmpui Chawng-thu chuan, hnam changkang apiangin upate hlutna leh ropuina an hre chiang tih sawiin, "Upate duat leh zah pawh an ti na hle. Upa an boral hian library pakhat ang a ni, an ti hial. Mizote pawh kawng engkimah nasa taka hma kan sawn karah hian, upate zahawmna hriain, kan duat thiam ve ta hle. Tar â kan ti mai
ṭhinte hi a titu kan ât vang a ni," a ti. Vanlalawmpuii hian North Vanlaiphai-a MUP Unit palite hnenah Upate Ni lawmpui nan Rs. 5,000 ṭheuh a hlan.

Chaltlang Lily MUP leh Chaltlang MUP-te pawhin Upate Ni pual hian hun an hmang a, AMC deputy mayor Lalringliana'n a hmanpui. Lalringliana chuan, "Upa pawl thurâwn lak thiamna hmun apiangah rorelna a felfai ṭhin. Chhiatni ṭhat-niah leh kohhranah pawh upate uapna hmun chu a zahawmin a thlamuan-thlak bik ṭhin," a ti.

Siaha Sub-Hqrs. MUP chuan Upate Ni pual hian IPR conference hall-ah hun an hmang a, MADC CEM mawhphurhna la mektu K Hrahmo-a'n a hmanpui. Hrahmo chuan, upate chu ram leh hnam rohlu an nih thu sawiin, "Kum upa kawl hnem ram apiang ram changkang leh ram hrisel, hnam fing an ni tlangpui ṭhin," a ti.

Kum 2011 chhiarpuiah senior citizen (kum 60 chung lam) Mizoramah 49,799 an awm a, chung zinga 25,469-te chuan tar pension (old age pension) an la mek a ni.