Venhimna chungchang DC-ah thlen

Mamit District Ṭhalai Pawl (DṬP) hruaitute chuan nimin khan Mamit District Task Force on Covid-19 chairman Dr Lalrozama, Mamit DC an hmu a, Mamit District Border Area Study Group on Covid-19 din turin an ngen a; District Task Force hnenah ṭanpuina Rs. 10,000 an hlân bawk.

Mamit DṬP chuan, Covid-19 laka Mizoram a him zel theih nan ramri venhim kawngah sorkarin tun aia nasa zawkin hma la se an duh thu an sawi a; Mamit district chu international boundary (Bangladesh), state boundary (Tripura leh Assam) hual vel a nih avangin an district leh Mizoram mipui an him zel theih nana hma latu tur bik Mamit District Border Area Study Group on Covid-19 din thuai a nih theih nan hma la turin an ngen a ni.

Tripura leh Assam ramri bula village task force-te an hah hle tih sawiin Mamit DṬP hruaitute chuan, ramri hnaiha village task forcete'n duty post an siam hmun ṭhenkhata force/ police indaih lo taka an awm chu pawi an tih thu leh a tam thei ang ber force mi dah belh an duh thu an thlen a; police duty zingah ruihhlo ngai man tur awm tawh lo se an duh thu an sawi.

CM Relief Fund aṭanga Mamit district tana sorkarin Rs. 18,60,000 a ruahman chu a lawmawm rualin, an district pachhiatzia hriatthiampuia ennawn tur leh an district tan CM Special Package sorkarin siam se an duh thu an thlen bawk.