Edenthar YMA-in zu tam tham tak an man

Edenthar Veng YMA duty-te chuan tun hnaiah rakzu eng emaw zat an man a, an leihbuaksak ṭhin. Edenthar Veng YMA vice president Ricky Vanlalnghaka'n Vanglaini palai zawhna chhanga a sawi danin, April 12, Pathianni khan mi eng emaw zat hnen aṭangin rakzu litre 86 an man a, niminah litre 10 vel an man leh bawk.

Ricky Vanlalnghaka chuan, zu an mante chu an leihbaw ṭhin a, a neitute erawh chu sorkar thuneitute hnenah thlen kher loin, an kaltir leh mai ṭhin tih a sawi a, "Tunah erawh chuan kan veng chhunga kan mante chu veng chhungah vantlang hna, khawlai tihfai ang chite kan thawhtir dawn," a ti.

Rangvamual lamah zu lâk tur a awm tawh mang loh avang leh Excise & Narcotics mite leh policete an duty ngawrh tawh avangin Edenthar Veng lamah zu zawng an kal nasa tih sawiin Ricky Vanlalnghaka chuan, "Kan veng ram chhung, Maumualah zu factory a tam a, zu la tura kal an tam a, man pawh kan man nasa," a ti a; tunah chuan Excise & Narcotics enforcement-te nen an duty ṭhin thu a sawi.

Edenthar Veng YMA Vice President chuan, zu la turte chu mi mut reh tawh hnu, zanlai pelh leh zing dar 2-3 velahte an kal fo thu a sawi a; nimina an man zinga pakhatphei chu UDPA department driver a nih anga chhuah phalna (permit) nei a nih thu a sawi bawk.