Bawngkawn Brigade ram chungchangah High Court-in sorkar notification a thiat

Bawngkawn Brigade ram buai chungchangah Gauhati High Court, Aizawl Bench chuan Mizoram sorkarin June 1, 2015-a notification a chhuaha sub-no. (i) chu a ṭhiat.

Bawngkawna Brigade ram buainaah hian ram neia inchhál mi 53-te chuan kum 2015 khan Gauhati High Court-ah writ petition panga an thehlut a; High Court judge LS Jamir chuan September 16, 2016 khan hearing neiin, petition thehluttute ukil leh sorkar ukilte thu a ngaithla a, hemi ni vek hian judgement a tichhuak a ni.

Judgement order-a a lan danin, Brigade ram hi hun rei tak luah ṭhintu sipaite'n September 9, 2008-ah Mizoram sorkarah a hlan a, chutih laiin, petition thehluttute chuan sipaiin an luah hma pawhin sipaiin an luah chin ramah ram an nei tih an sawi thung.

Land Revenue & Settlement department-in Brigade ram chu a enfiah a, a verification report pawh November 23, 2011-ah Council of Ministers-ah thehluh a ni. Sorkar chuan Brigade ram chu block pakuaah ṭhenin, block hrang hrangah chuan zirna in, NABARD leh hotel project, Revenue date processing centre, skill development centre, urban haat, convention centre, damdawi-in, fire station, sports complex leh vangtlang mamawh dang atana hman turin a ti a ni. Chu rawtna chu Council of Ministers-in December 1, 2011-ah a pawm.

Mizoram sorkar chuan The Mizoram (Land revenue) Act 2013 Section 14, sub-section (1)-in thuneihna a pek angin notification a tichhuak a, Bawngkawn Brigade area chu vantlang mamawh, damdawi-in leh thil dang atana hman tura tih a nih thu a puang.

Sorkar chuan The Mizoram (Land Revenue) Act 2013 Section 12 hmangin June 1, 2015-ah notification a chhuah leh a; Brigade ram chu vantlang pawimawh atana hman a nih dawn avangin, a chhunga LSC leh House Pass 96 awmte chu tihtawp a, a neitute chu hmun dangah ram pek a nih tur thu a puang leh a ni. He notification hi ram neitu nia inchhálte chuan duh loin, Gauhati High Court-ah writ petitiion an thehlut ta a ni.

High Court Judge chuan petition thehluttute ukilte leh sorkar ukilte thiamthu sawi a ngaihthlak hnuah thutlukna a tichhuak a; sorkarin Brigade area-a LSC leh House Pass neitute ram a laksakna tura June 1, 2015-a hriattirna a chhuah chu hman loh turin a ṭhiahsak.

Sorkar notification-a Court-in a ṭhiah tak chu, '(i) The loca-tion of all 96 (ninety six) LSCs and House Passes listed in the Annexure 'A' should be transferred to other locations as may be deemed suitable by the Government so as to enable the Government to utilize the area for public purposes' tih a ni.

Ukilte hnen aṭanga thu dawn danin, Mizoram sorkarin vantlang tana hman tura a tiha LSC leh House Pass 96 a laksakna leh pass-te chu hmun danga sawn tura a tihna noti-fi-cation a chhuaha dan a tlawh-chhan hi a dik lo a, chuvang chuan High Court-in a ṭhiahsak a ni. Chutih rualin, High Court chuan sorkar chu ram lak a duh a nih chuan, Land Acquisition Act tlawhchhana ti turin a hriattir.