SpiceJet a thlawk ṭan dawn

India rama thlawhna service liante zinga mi, SpeceJet chu Mizoramah a service ve dawn ta a, vawiin hian Lengpui Air-port-ah hawn a ni dawn.

Aizawl leh Kolkata inkara thlawk tur SpiceJet flight hi vawiin chawhnu dar 2:30 hian Governor Lt.Gen Nirbhay Sharma-a'n a hawng dawn a, SpiceJet senior vice president (Commercial) Shilpa Bhatia-i pawhin a hmanpui dawn a ni.

GAD Aviation Wing aṭanga thu dawn danin, SpiceJet hi Kolkata-Aizawl leh Guwahati-Aizawl inkarah ni tin a thlawk dawn a; Kolkata aṭangin chawhma dar 10:55-ah chhuakin, chhun dar 12:10-ah Lengpuiah a ṭum ang a, Lengpui aṭangin chhun dar 12:30-ah Guwahati a pan ang. Guwahati aṭangin chawhnu dar 1:50-ah Aizawl panin, dar 2:50-ah Lengpuiah a ṭum ang a, Aizawl aṭangin chawhnu dar 3:10-ah Kolkata a pan leh ṭhin dawn a ni.