MZU-ah sumdawnna atana Mizoram pawimawhna leh tih tur zirho dawn

Kolkata-a Research Centre for Eastern & North Eastern Studies (CENERS-K) leh Mizoram University ṭangkawp chuan October 5-6, 2016 hian MZU-ah 'Mizoram, Gateway to South East Asia? What needs to be done?' tih thupuia hmangin seminar an buatsaih dawn a; seminar buatsaih a nih chhan leh an thil tumte nimin khan IPR conference hall-ah thuthar thehdarhtute an hrilh.

CENERS-K hruaitu Lt.Gen. JR Mukherjee leh Maj.Gen. Arun Roye chuan, sorkarin laipuiin Act East Policy a kalpui mekah South East Asia leh India ram insumdawn tawnna turin Mizoram chu hmun ṭha tak a nih thu an sawi a, "Mizoram awmna hmun hi duhthusam a nih bakah, hmarchhakah Mizoram anga hmun ralmuang a awm lo. Mahse, sumdawnna hmunpui ni tur hian rilru lama lo inpuahchah a pawimawh a ni," an ti.

CENERS-K hruaitute chuan, Act East Policy kalpui chu Mizo mipuite'n an chhawr tâwk loa a hriat thu sawiin, "An chhawr loh chhan chu mipuite an inrawlh tâwk loh vang a ni a, chhawr tur chuan inrawlh ve a ngai," an ti a; hma lam huna dinhmun duhawm taka din theihna hun ṭha awm mek chu bawhpelh lo a, a taka a hlawhtlin theih nan mipuite chu nasa zawka ṭan la tura an duh thu an sawi.

Press conference-ah hian CE-NERS-K hruaitute hi Industries secre-tary Zothankhuma leh MZU zirtirtute'n an ṭawiawm a, seminar-ah hian tel ve turin mipuite an sáwm a ni.

Seminar hi Governor Lt.Gen. Nirbhay Sharma leh chief minister Lal Thanhawla te pawhin an hmanpui dawn a; seminar-a zir chhuah hrang hrangte chu chhinchhiahin, tihhlawhtlin a nih theihna atan sorkar laipui leh Mizoram sorkarah thawn a ni ang.