VANGLAINI ZIRCHIANNA Gas tichingpentute man vangin gas a váng Sorkarin IOC chhanna a nghâk mek
July 2016 vela Central YMA leh media-te ṭangkawpin Mualkhang leh Aizawl inkara eirawngbawlna gas tihchingpen chíng driver leh an thurualpuite leh gas tihchingpenna atana hman gas bûr ruak eng emaw zat an man chhuah hnuah Mizoramah gas lak luh a tlahniam a, gas a vân phah. Hei vang hian Mizoram sorkar chuan hma lain, Indian Oil Corporation (IOC) chhanna a nghak mek.
Thu dawn danin, gas tichingpen ṭhin driver-te'n an hlawh baka an sum lak luhna tihchhiat a nih vang leh an sum lak luh a tlem tak vang nia ngaih theihin anmahni chhawrtu, gas phurtu contractor-te lakah an lungawi lo a; chumi kal zelah chuan kumin July leh August thlaah Mizoramah gas phurh luh a tlakhniam phah hlea ngaih a ni.
Thu dawnnain a sawi danin, IOC chuan gas phur turin tender a chhuah a, a chhangtu zinga a hniam ber chu carrying contractor atan thlan niin, contructor chuan Mualkhang Gas Bottling Plant aṭangin gas an phur chhuak ṭhin. Contractor-te chuan gas phurh nan mi dang truck an hmang ṭhin bawk.
Driver-te chuan gas chu ṭha takin an phur ṭhin a, gas-ah harsatna em em sawi tur a awm lo. Chutih laiin, kumin July thla vela Central YMA leh media-te'n gas khawih chingpen lai an nanchin leh an man avangin, gas tichingpentu driver-te chuan anmahni ruaitu contractor hnenah an hlawh tlem an tih avangin lungawi lohna an thlen. Contractor chu tender chháng hniam ber a nih vang leh driver-te hlawh a pek tam theih si loh avang nia ngaih theihin gas phurh lamah harsatna a thleng zui ta a ni.
Gas tichingpen ṭhinte leh an tihchingpenna hmanruate man a nih hnuah, kumin July leh August thlaah khan kumina thla dang zawng aiin Mizoramah gas a thleng tlem a; chutih laiin, Mualkhang leh Borkhola-ah chuan gas-ah harsatna a awm lo a, lak tur a awm reng niin an sawi.
Contractor hian truck 33 a hmang ṭhin a, gas phur ve tho distributor-te'n truck 12 an hmang bawk a, a vaiin 45 hman a ni. Distributor-te hian tun hma angin gas phur an tlantir tam thei tawh lo a, kumina tender chhuah chu kum dang aiin a hniam zawk niin an sawi.
Mizorama gas a thlen tlem chhan hi a phur ṭhintu truck driver-te lungawi loh vang leh contractor mawhphurhnaa ngaih a nih avangin Mizoram sorkar chuan contractor chu hrem a nih theih nan IOC-ah a thlen a; contractor vanga harsatna a awm a nih chuan, additional contractor ruai mai turin hma an la nghal a ni.
IOC plant manager pawhin additional contractor ruat a nih theih nan IOC hmunpui, Guwahati-ah September 23, 2016 khan ngenna a thlen tawh a, IOC lamin an chhanna nghah mek a ni.
Thu dawn danin, Mualkhang Gas Bottling Plant aṭang hian Mizorama gas mamawh 60% vel lak a ni a, Borkhola, Silchar aṭangin 40% lak luh a ni bawk. Mualkhang leh Borkhola-ah hian gas-ah harsatna a awm lo a, a phurtu lamah harsatna a awm vangin Mizoramah gas a harsat phah niin an sawi.
Kumin January thlaa Mizorama gas phurh luh chu bûr 1,30,276 a nih laiin, Central YMA-in hma a lak hnu, July thlaah chuan bûr 93,316 chauh phurh luh a ni a; CYMA-in gas tihchingpen titawp tura hma a lak hnuah gas phurtute lungawi loh vangin gas lak luh a tlahniam hle a ni.
2016-a Mizorama gas lak luh zat
Thla Domestic Commercial Total
January 1,29,230 1,046 1,30,276
February 1,14,633 876 1,15,509
March 1,34,315 1,553 1,35,868
April 1,38,016 1,296 1,39,316
May 1,28,168 1,188 1,29,356
June 1,34,724 1,650 1,36,374
July 92,416 900 93,316
August 1,03,440 2,296 1,05,736