PYD-in Social Work Day hmang

UPC (North East India)-a ṭhalai pawl, PYD-te chuan nimin khan Mizoram hmun hrang hrangah Social Work Day an hmang a; Aizawlah chuan thisen pek rûnpui neih niin, thisen unit 143 an pe.

UPC (NEI) PYD-te hian Social Work Day hi kum 2000 aṭanga hmangin, kum tin October 2-ah an hmang ṭhin a, vantlang leh khawtlang tana thil ṭha leh ṭangkai tihna ni atan hmangin, an hnatlang ṭhin. Kuminah chuan Social Work Day hi Pathianni-ah a tlak avangin nimin khan an hmang a, UPC (NEI) chhunga district 11-ah district, bial leh tualchhungahte an remchan dan angin an hmang a ni.

PYD Social Work Day hi Aizawl khawpui chhunga district pahnih, North Mizoram leh Aizawl East district-a bial 16-te chuan Central YMA Hall-ah an hmang a; General PYD Choir, North Mizoran District Choir leh Aizawl East district Pentecostal Choir ten fakna hla an rem. Thisen pek rûnpui an buatsaih nghal a, Aizawl Civil Hospital tan mipa 122 leh hmeichhia 21-te'n thisen unit 143 an pe a ni.