KHAWTHLIR

Autumn Exhibition

Hnam Chhantu Pawl chuan nimin khan Vanapa Hall-ah Autumn Exhibition 2016 an buatsaih a, parliamentary secretary (Industries) Joseph Lalhimpuia'n a hawng. Exhibition hian October 5, 2016 thleng a awh dawn a; thing leh mau aṭanga thil siam chhuah - ṭhutthleng, báwm, plate, bowl, tàrmawi chi hrang hrang bakah, puan, kawr leh Mizo kutchhuak thil dangte an zuar a ni.

NDPS Act zirho

Nimin khan Siaha DC conference room-ah Siaha district chhunga police-te tan NDPS Act zirhona buatsaih a ni a, Siaha SP SD Mishra-in a hmanpui. Training-ah hian CJM Lalremsanga'n ‘Common loopholes by case I/O and causes of acquittal in NDPS Act cases’ tih thupui a sawi a; additional SP Francis L Ralte-in 'Guidelines for investigation of NDPS Act cases’ tih thupui a sawi thung.

NLUP sem

Industries department chuan nimin khan Serchhipa an complex-ah an department hnuaia NLUP thlangtute hnenah ṭanpuina an sem a, Vanlalawmpuii Chawngthu, MLA-in a hmanpui. NLUP ṭanpuina hi chhungkaw 182 hnenah Rs. 90,16,500 leh mi 18 hnenah puanṭhui khawl Rs. 10,26,000 man sem a ni.

Faina Hapta

Nimin zing khan Kolasib Venglaia Mahatma Gandhi lim bulah Kolasib DC H Lalengmawia chu Faina Hapta, 2016 a hawng. Kolasib DC chuan Faina Hapta-ah pawn lam bakah, chhungril faina ngaihpawimawh a ṭul thu sawiin, Faina hian hriselna a thlen a, hriselna chuan hmasawnna, hriatna leh finna a thlen a ni," a ti.

Ran enkawl zat

August 2016 chhung khan AH&Vety dept. Aizawl chuan OPD-ah ran chi hrang hrang 2829 leh mobile clinic-ah ran 24,963 an enkawl a, ran 565 an zai. August thla chhung vek hian sorkarah Rs. 38,440 an chhung lut.