Jail-a HIV/AIDS dona tur programme hawng

Central Jail-a tángte zinga HIV/AIDS dona kawnga hma lakna tur, 'Prison HIV Intervention' programme chu nimin khan Health minister Lal Thanzara’n Aijal Club-ah a hawng a; NACO, Centers for Disease Control and Prevention leh FHI 360-te buatsaih ‘HIV prevention, care and treatment services in prisons of NE states of India’ tih lehkhabu a tlangzarh bawk.

Lal Thanzara chuan, HIV/AIDS dona kawnga hma latu mimal leh pawl hrang hrangte thawhrimna chu a hlawhtlin ngei a beisei thu sawiin, jail tángte zinga hmalakna tur buatsaih a ni chu lawmawm a tih thu leh tángte'n an hlawkpui ngei a beisei thu a sawi.

Health Minister chuan, MSACS leh mi ṭhahnemngaite'n theihtawp an chhuah mek laia HIV vei hmuhchhuah belh zel a ni chu pawi a tih thu a sawi rualin, ṭhahnemngai taka hma latu an awm zel avangin hmasawnna hmuh a beisei thu a sawi a, "Mi ṭhahnem-ngaite leh mi inpete thawhrimna ringawt hi HIV/AIDS do nan a tawk lo a; mimal, pawl, kohhrante leh remchan dan hrang hranga mi tu pawhin tih tak zeta kan dopui leh kan tlangaupui a ṭul tak zet tawh a ni," a ti.

FHI 360 country director Dr Bitra George chuan, Mizoram chu hmarchhak state-a central jail-a HIV Intervention programme an kalpuina hmasa ber dawttu a nih thu a sawi a, "Imphal-ah September thla aṭangin kan kalpui tawh a, Nagaland leh Meghalaya-ah pawh hawn leh thuai kan tum," a ti a; central jail-a an hmalaknain a tum ber chu, jail tángte HIV laka an him thrih nana hmalak leh a vei mekte enkawl a, nun dan ṭha zawka an nun theih nana hmalak a nih thu a sawi.

Inkhawmah hian Health secretary Lalrinliana Fanai, National AIDS Control Organisation depurty director general (Targerted Intervention) Dr Neeraj Dhingra leh NACO joint secretary Dr CV Dharma Rao te pawhin thu an sawi a; SHALOM director Dr Chawnglungmuana'n jail tángte zinga HIV/AIDS chungchanga an hmalak tawh dante a sawi bawk.

Prison HIV Intervention hi NACO bultum a ni a, MSACS, FHI 360 leh SHALOM-te'n jail tángte zingah HIV/AIDS do hna an thawk dawn a ni.