Central YMA-in Henry Lalbiakzinga sumdawn dan an huat thu an puang

Central YMA chuan thuchhuah siamin, Henry Lalbiakzinga Chhundeng, Dinthar, Aizawl leh a thurualpuite'n ruihhlo hmanga sumdawnna an kalpui chu an huat tak zet thu an tarlang a; a phû tâwka hrem ngei an phût.

CYMA chuan, "Kan ṭhalai tam tak ruihhlo bâwia an tàn mek lai leh nunna hial an chàn tawh laia ruihhlo hmanga sumdawnna kalpui a ni hi kan haw tak zet a, Henry Lalbiakzinga Chhundeng leh a thurualpuite hi an phû tâwk anga dan hmanga hremna an chunga lek a nih ngei theih nan CYMA chuan a thlir zui reng a ni," an ti a; hemi kaihhnawiha YMA, Kulikawn Branch leh Ramhlun North Branch hmalakna ṭha an ti a, an thlàwp tlat thu an tarlang.

Mizoram Police-in March 15, 2025-ah heroin hawng 440 leh a neitua puh Henry Lalbiakzinga Chhundeng leh a thurualpuite an man chu lawmawm an tih thu sawiin CYMA chuan, "Mizoram Police-te thawhrimna kan chhuang tak zet," an ti.

CYMA chuan, Mizorama ruihhlo hluar zelah YMA-in theihtawp chhuahin hma a lak zel thu leh Central Anti-Drugs Squad (CADS) pawh din thar a ni a, March 15, 2025 aṭanga hma an lak ṭan thu an sawi a; YMA branch, group leh sub-headquarters-te chu an huam chhungah thâ thlah loa ruihhlo leh a kaihhnawih thil ṭha lo do turin an chah bawk.