Ruihhlo doa Mizoram sorkar hmalakna ṭanpui dan ruahman turin central ngen

April 7-8, 2025 chhung khan Ministry of Social Justice & Empowerment buatsaihin Dehradun, Uttarakhand-ah National Review Conference neih a ni a; Social Welfare & Tribal Affairs minister Lalrinpuii telin, nimin khan Mizorama ruihhlo do dan a tarlang a, Mizoram sorkar hmalaknate ṭanpui theih dan ruahman turin sorkar laipui a ngen.

Lalrinpuii chuan, Mizoramah ruihhlo a hluar avangin theihtawp chhuaha do a nih thu a sawi a; National Action Plan on Drug Demand Reduction leh Nasha Mukt Bharat Abhiyan hnuaia hmalakna piah lama Mizoram sorkar hmalaknate ṭanpui theih dan ruahman turin Ministry of Social Justice & Empowerment hotute a ngen a ni.

SWTA Minister chuan, Mizoram sorkarin rualbanlo pension leh tar pension chu Rs 100 aṭangin Rs 1,000-ah a tihpun thu a sawi a; thingtlang mipui chhâwk zângkhaina turin sorkarin mitthi ruang phurh man a tumsak tawh thu a sawi bawk.

National Review Conference hi Social Justice & Empowerment minister Dr Virendra Kumar-a'n a kaihruai a; minister of state pahnih - BL Verma leh Ramdas Athawale te, state hrang hranga Social Welfare minister-te leh official-te an tel.

Inkhawmpuiah hian Ministry of Social Justice & Empowerment hnuaia scheme hrang hrang hmalaknate leh huang zauh theihnate sawiho a ni a; kutdawh chungchang te, Indore khawpuiin India rama Beggar Free City hmasa ber an nih theihna tura hma an lak dante zirho a ni bawk.