SYS Minister-in Central hotute a kâwm

Sports & Youth Services minister Lalnghinglova Hmar chuan nimin khan New Delhi-ah Ministry of Youth Affairs & Sports hotute a kâwm a, Mizoram ṭhalaite hmasawnna kaihhnawiha hmalakna kal mek leh hmathlirte a sawipui.

Lalnghinglova Hmar hian sorkar laipuia Department of Sports secretary Sujata Chaturvedi, SAI director general ni bawk hmuin, Mizorama SAI Training Centre tihchangtlun dan tur a sawipui bakah, ruahmannate ziakin a pe. Ruahmannate chu an lo bawhzui tur thu Sujata Chaturvedi chuan a lo hrilh a; April 26, 2025-a 'Aizawl International Half Marathon' neih turah SAI hriatpuina leh pawmpuina a dilah hma a lakpui ngei tur thu a sawi.

Sports Minister hian Department of Youth Affairs secretary Meeta R Lochan pawh a pisaah a hmu a; Mizo ṭhalaite'n state pawna 'exposure' tam zawk an neih theih dan tur a sawipui bakah, Mizo ṭhalaite tana ṭangkai thei Ministry hmalakna kal mek leh hmachhawpte an sawi dun.

Lalnghinglova chuan, kumin kum tawp lamah Mizorama ṭhalai intawhkhawm lian huaihawt an duh thu a sawi chungchangah Meena Lochan chuan, ziaka rawtna thlen tur leh rawtna a awm hunah a bawhzui tur thu a sawi. Youth Hostel sak chungchang pawh an sawi dun bawk.