KHAWTHLIR

Chawlh puang

General Administration Department chuan office memorandum chhuahin, Dr BR Ambedkar pian champha April 14, 2025 (Thawhṭanni) chu sorkar chawlh atan puan a nih thu a tarlang. Sorkar office, zirna-in, bank-te leh public undertaking-te chawlh tur a ni.

Vaihlo zawrh khap

Aizawl district magistrate Lalhriatpuia chuan thupek chhuahin, Aizawl district-a zirna-in awmna aṭanga ft 300 (yard 100) huam chhungah vaihlo aṭanga siam thil hrang hrang te, Shikhar leh e-cigarette (vape)-te zawrh khap a nih thu a puang. Thupek hi sikul naupangte zûk leh hmuam leh taksa tana thil ṭha lo hrang hrang laka an him theihna atana chhuah a ni a; thupek zâwm lote chu dan hmanga hrem theih an ni.

ZORO-in pawi an ti

Zo Re-unification Organisation chuan thuchhuah siamin, tun hnaia Manipur-a Zo fate inkara buaina chhuak leh chumi kaihhnawiha thi an awm te, hliam eng emaw zat an awm leh hmun him pana mahni in chhuahsan an awm thar leh chu pawi an tih thu an tarlang. "Unau inkara buaina chhuak hi khawiah mah thleng nawn tawh lo se kan duh. Zo fa, chi tinte inzah tawn leh inngaichâng tawn turin kan ngen a, thu inbah sual palh a awm pawha a dam zawnga chinfel dan zawng turin kan ngen a ni," an ti.

Thehlut turin ti

Phaizau Village Council chuan thuchhuah siamin, Phaizau ram huam chhunga ram neite'n periodic patta/VC pass/ district council pass, huan pass photo copy (xerox) an neih ang ang July 2025 ral hmaa Phaizau VC Secretary hnenah thehluh tur a nih thu an tarlang a, "Hun tiam chhunga thehlut lo chu an ram pass cancel a ni ang," an ti.

ZPM Ṭhalai lawm

ZPM Ṭhalai chuan thuchhuah siamin, football-in hma a sawn theihna tura Mizoram Football Association-in naupangte tan kum 1 dáwn hnuah Lammualah MFA Grassroot Centre an kalpui leh tur chu lawmawm an tih thu an tarlang a, hmang ṭangkai turin Mizo naupangte duhsakna an hlân.