Poshan Pakhwada 7th Edition kalpui ṭan a ni

Nu leh naupang hriselna ngai pawimawh tura inzirtirna, 'Poshan Pakhwada’ 7th Edition chu Mizoram pumah hman ṭan a ni dawn a, nimin khan chief sectretary Khilli Ram Meena-a'n CS video conference room-ah a tlangzarh.

Poshan Pakhwada 7th Edition hi April 8-25, 2025 chhungin hmun hrang hrangah hun hman a ni dawn a; zirhona (webinar) te, hman khat daih sarâng hman lo tura inzirtirna te, electronic hmanraw chi hrang hrang (phone, tablet, computer, TV, etc) hmaa hun hmang nasa lutuk lo tura inzirtirna te, Poshan Panchayat leh extempore speech-a intihsiakte buatsaih a ni ang.

Poshan Pakhwada 2025 thupuite chu - ni 1,000 pawimawhna chungchang te, beneficiary module (mipui vantlangin anmahni hmalakna leh duhthua anganwadi centre-a an inziah luh theihna) thehdarh te, chawṭha ei tawk loh vanga naupang hrisel lo enkawl dan inzirtir te, thau lutukna (obesity) laka inven dan inzirtirnate a ni.

Pakhwada hawnna inkhawm hi Social Welfare, Tribal Affairs, Women & Child Development secretary Lalzarmawii'n a kaihruai a, Women & Child Development director Zoramthangi Chhangte-in Poshan Pakhwada 2025 hman dan tur a sawifiah.

Chief secretary Khilli Ram Meena chuan, nu leh naupang hriselna tihhmasawnna tura hmalakna Poshan Pakhwada leh a thupui kente a hlawhtlin ngei nan ṭanrual a tul thu sawiin, khawtlang hrisel siamna kawngah nu leh naupangte hriselna enkawl ṭhat a pawimawh thu a sawi.

Khilli Ram Meena chuan, nu, nau pai leh nau pawm mekte leh naupangin an mamawh ang ei tur ṭha an hmuh ngei theih nan Poshan Pakhwada 7th Edition chu ṭangkai taka hmang turin Pakhwada kalpuinaa mawhphurtute a chah bawk.