Ram hmangaihna tak tak nena thawh a pawimawh - PWD Minister

PWD minister Vanlalhlana chuan, PWD chu kawng siam, in sak, lei dawh leh project lian tak tak hna thawk ṭhin an nih avangin fimkhur tak leh ram hmangaihna tak tak nena thawh a pawimawh thu a sawi.

Vanlalhlana hian April 7, Thawhṭanni zan khan Siaha tlawhin, district chhunga sorkar official-te nen Circuit House tualah an inkâwm a, "PWD hi department pawimawh tak a ni a, kawng siam bakah in sak te, lei dawhte leh project lian tak tak thawk ṭhin kan nih avangin fimkhur tak leh ram hmangaihna tak tak nena thawh a pawimawh," a ti.

PWD Minister chuan, kawngpui siam ringawt a tâwk lo a, kawngpui siamte chu ṭha taka enkawl zui a ṭul thu sawiin, department-a thawkte chu theihtawp chhuah turin a chah a; Siaha district chhunga kawng dinhmun chiang zawka en tura zin leh ngei a tum thu a sawi bawk.

Minister hi Thawhṭanni zan khan Siahaah a riak a, Siahaah hian bialtu MLA Dr K Beichhua, MADC chief executive member M Laikaw leh a thawhpui te, bawrhsap VL Hruaizela Khiangte leh sorkar officer dangte'n an lo dawngsawng. Nimin zing khan Lawngtlai a pan a ni.

PWD Minister hi Assembly deputy speaker Lalfamkima, Lunglei West bialtu MLA T Lalhlimpuia, PWD engineer-in-chief H Zoramliana leh PWD hotu dangte'n an ṭawiawm.