Larsapin NCC cadet chawimawina a hmanpui

T Romana College leh 1 Mizo Bn NCC chuan nimin khan T Romana College NCC-te hlawhtlinna lawmna leh NCC cadet-te chawimawina hun T Romana College Auditorium-ah an buatsaih a, Governor Gen. Dr Vijay Kumar Singh-a'n hmanpuiin chawimawina a hlân.

Gen. VK Singh chuan, T Romana College NCC-te hlawhtlinna chu chhuanawm a tih thu a sawi a, "Hei hian zirna ṭha tak a ni tih a lantir. Mimal thawh rah chauh a ni lo a, college-a thawk zawng zawngte leh zirlaite inkara thawhhona ṭha neih vang a ni," a ti.

NCC chu hamṭhatna hrang hrang leh hna hmuhna tura pawimawh a nih piah lamah, mihring chhawr tlak leh ṭha zawk ni tura quality leh value siamtu a nih thu sawiin Larsap chuan, khawtlang mamawh mihring ṭha zawk chher chhuaktu a nih thu a sawi.

T Romana College NCC (1 Bn. Mizo NCC) hi August 4, 2003 khan din a ni a, cadet 1,860 vel zir chhuak tawhin, cadet 80 an awm mek. March 25, 2025-a Guwahati-a North East Region (NER) huam chhunga NCC ti ṭha 'Best Educational Institutes for NCC NER 2024-2025' lawmman semnaah TRC (1 Mizo Bn. NCC) hian Mizoram college hrang hrang zinga NCC kalpui ṭha ber 'Best NCC College in Mizoram 2025' atan thlan a ni.

Chawimawina hi kum 2024 khan an dawng tawh a, kumin hi a zawna an dawnna niin, TRC zirlai junior under officer (JUO) Jacksy Lalhlimsangi chu Best Cadet NCC NER 2024-25 hnuaiah Silchar Region, Girls (Army wing & others) category-ah cadet ṭha bera thlan a ni bawk.