Ráltlânte tihhmingchhiatna atana thu thehdarh chíng an awm - MZP

MZP chuan thuchhuah siamin, thil eng emaw hlekah Zo hnahthlak ráltlânte phih awhna tur dapa tihhmingchhiatna atana thu thehdarh chíng an awm ṭhin chu vanduaithlak an tih thu leh, chutiang chuan Zo fate inpumkhatna leh inunauna a tichhiat thu an tarlang.

MZP hruaitute nimina ṭhukhawm chuan Mizorama ráltlânte dinhmun an thlirho a; thuchhuah siamin, "Raltlante zingah thil tisual an awm chuan dan anga hrem turin thuneitute kan ngen. Chutih rualin, eng emaw hlekah raltlante phih awhna tur dap a, raltlante tihhmingchhiat nana thu thehdarh ching kan awm ta fo hi vanduaithlak kan ti a, hei hian Zo fate inpumkhatna leh inunauna a tichhe hle a ni," an ti.

Mizoramah raltlan an tam tawh avangin hnawk tihna ṭawngkam a tam ta hle tih sawiin MZP chuan, "Thu belhchian dâwl lo hmanga raltlante puhchhiatna finfiaha rang taka chhui chhuaktu Mizoram Police chungah lawmthu kan sawi a ni," an ti a; Zo fate inunauna tichhe thei zawnga hmalakna leh ṭawngkam nei lo turin mi tin an ngen.

MZP chuan, raltlante enkawl dan leh chhawmdawlna mumal zawk a awm theih nan Mizoram sorkarin dan mumal tak siam thuai se an duh thu an tarlang a, "Hei hian Mizoram mipui leh raltlante inkarah inhriatthiamna a siam kan beisei," an ti.

Ram a buai vanga Mizorama ráltlante chu Mizo mipuite'n duat taka an lo dawngsawng leh an tuamhlawm chu Mizo zia, Kristian nihna anga tih tur dik taka an ngaih thu MZP chuan an tarlang bawk.