International Year of Cooperatives hmang
Cooperation department chuan nimin khan an conference hall-ah International Year of Cooperatives (IYC) an hmang a, Cooperation department kum 50 tlin an lawm nghal. Khuallian Cooperation minister PC Vanlalruata chuan, cooperative movement chu ṭhalaite an tel loh chuan a ral mai dawn niin a sawi.
Minister PC Vanlalruata hian IYC 2025 leh Cooperation department golden jubilee hriatrengna lungphun (monument) a hawng a; Cooperation department-in ‘Awareness Rally’ an huaihawt huna hâk tur Mizoram Cooperative Apex Bank-te'n an tumsak t-shirt a tlangzarh bawk.
PC Vanlalruata chuan, Cooperation department-a thawkte chu hmathlirah hmasawnna ngêlnghet (sustainable development) nei turin a chah a, "Cooperative movement hmang hian kan state kan tihmasawn thei. Kan ṭhalaite hi cooperative movement-ah kan hnuh luh a ngai a, a nih loh chuan ral (collapse) thei dinhmunah kan ding thuai dawn," a ti a, college hrang hrangah cooperative movement awareness campaign buatsaih a duh thu a sawi.
Cooperation Minister chuan, kum 2025 hi United Nations-in a ṭum hnih nan International Year of Cooperatives atan a puang tih sawiin, "Thupuiah pawh ‘Cooperatives build a better world’ tih a hmang. Kumin 2025 hi khawvel huapa Cooperation department ngaih pawimawh kum a ni a, Mizoram pawhin IYC pual hian hmalakna hrang hrang kan nei dawn," a ti.