CM hoin FOCUS 2.0 kalpui tur sawiho

Nimin khan chief minister Lalduhoma leh International Fund for Agricultural Development (IFAD) Design team-te CMO-ah an inkâwm a, Mizorama Fostering Climate Resilient Upland Farming Systems in the North East (FOCUS) 2.0 kalpui dan tur an sawiho.

Chief Minister chuan, FOCUS 2.0 atana tih tur ruahmanah belh deuh hlek ṭula a ngaihte sawiin, scheme dang nena kalkawptir (convergence) a ṭhat a rin thu pawh a sawi. Hmalakna inthuah (duplicacy) a awm loh nan department dangte nena inhre tawna kal a pawimawh thu leh, thil thar chìn chhuah (innovation) lama hmalak uar ṭha a tih thu a sawi bawk.

IFAD country programme analyst Piyush Kanal chuan, FOCUS hmasa kum 2019 aṭanga 2024 thlenga kalpuiah Mizorama district paruka khaw 272 tuam a nih thu sawiin, chhungkaw 55,000 tana hma an lak dan tlangpui a tarlang a; FOCUS hmalakna zarah chhungkaw 41,888 chuan sik leh sa inthlak tuar thei eizawnna (climate resilent practice) an thlang zui ta nia an hriat thu a sawi.

IFAD mission director Alessandra Cage chuan FOCUS 2.0 (a thawh hnihna) kalpuina tura ruahmanna tlangpui a sawifiah a; Mizoram district 11-a RD block 26 huamin khaw 700-ah kalpui tum a nih thu a sawi.

Alessandra Cage sawi danin, FOCUS 2.0-a pawimawh tak chu - kutkawih eizawnna (entreprenuership) leh thil thar/siam chhuah hralhna buaipui te, thar chhuah tihpun te, sik leh sa inthlak tuar thei chi thlai chin uarte a ni. Hengte hi Mizoram sorkarin Zau Policy a kalpui tur nena kalkawptir theih tura ngaih a nih bakah, Bána Kaih nena inhne rem taka kalpui theih tur a ni bawk.

IFAD Design team hi Agriculture & Farmers' Welfare additional director Lalengzami, FOCUS state project director ni bawk leh FOCUS thawktu dangte'n an ṭawiawm a ni.