Gas tichingpentute laka beihpui thlak turin Central YMA-in Mizoram mipuite a ngen

Central YMA chuan thuchhuah siamin, eirawngbawlna gas tichingpen ṭhin leh black-a zuar ṭhinte laka ram puma beihpui thlak zel turin Mizoram mipuite a ngen a, gas lak dawnah lo bûk zel turin YMA branch tinte a chah bawk.

CYMA thuchhuah chuan, misual leh pamham ṭhenkhatte'n gas an khawih chingpen ṭhin vangin Mizo mipuiin gas bûk tling lo an lak a ngaih phah ṭhin tih sawiin, "Mipuite tawrhna hi CYMA chuan hriain, April 2016 aṭang khan hma a la ṭan a. September 2016 thlengin gas tihchingpen chingte hnen aṭangin bûr 604 man chhuah a ni tawh," a ti.

Central YMA chuan, an hmalaknain rah duhawm a chhuah mek laiin, gas tichingpentute leh mi ṭhenkhat inthurualte vangin Mizoramah gas a harsa ta rih nia sawiin, "Gas tichingpentute hrêk beh an nih vanga mipui chanvo gas a harsa ta hi CYMA chuan hriatthiam har a ti a, dik lo taka Mizo mipuite bum a, hlawkna lo tèl tumtute hi CYMA chuan a dem tak zet," an ti a; chutianga inhnamhnawihte chu an hrem an nih theih nan a ṭul anga hma la turin sorkar an ngen.

Kum khata gas bûr 12 dawng pha lo leh gas tichingpentute vanga Mizo mipuiin harsatna chu a ṭul anga sorkar laipuiah thlen an tum thu sawiin, CYMA chuan, "Gas tihchingpen a nih loh nana CYMA hmalakna pakhat, temper proof seal, IOC hotute hnena hmang tura a tih pawh a lem duplicate a lo chhuak leh hman tawh a. Heti khawpa Mizo min zah lotu leh bum tlak leka min hmutute hi Mizo mipuite'n kan hneh ngei theih nan, ram leh hnam tana ṭangrual turin Mizo mipui kan ngen a ni," an ti.