Ruihlo hi rál doa do a ngai : HM

National AIDS Control Organisation (NACO), Mizoram State Aids Control Society (MSACS) leh FHI360 te ṭangkawp chuan, nimin khan Excise & Narcotics conference hall-ah HIV/AIDS dona kawnga inrâwnkhawmna an buatsaih a; khuallian, Home minister R Lal-zirliana chuan, ruihhlo chu rál doa do a hun tawh thu a sawi.

Home Minister chuan, "Ruihhloin kan ram nun nasa taka a tihbuaia a tihchhiat zel avangin ruihhlo hi rál do tak taka do a ngai tawh a, hei hi mi tin mawhphurhna a ni. Ruihhlo hman khawlohin a thlen hri ṭha lo HIV/AIDS tirêm tur leh a vei mekte enkawl kawnga NGO hrang hrangte leh MSACS leh sorkar programme hmanga hmalakna lo awm tawhte lawmawm viau mah se, hmabak erawh a la tam a ni," a ti.

NACO-in national AIDS programme-a law enforcement agency-te telh tura hma an la chu lawmawm a tih thu sawiin R Lalzirliana chuan, "Ruihhlo do kawnga kan hmalak dan inang lo deuhte awm mah se, kan thil tum a thuhmun a ni," a ti a; thiamna ṭheuh leh theihnate hmang ṭangkai tawn a, thawhhona ṭha tak a awm a beisei thu a sawi.

Khualzahawm, NACO hotu Dr CV Dhama Rao chuan, HIV/AIDS veite'n inenkawlna ṭha zawk leh nun zahawm tak an nei theih nana hmalak chu NACO thil tum zinga mi a nih thu a sawi a, "HIV/AIDS hi a darh zel loh nan a vei mekte'n uluk taka enkawl an mamawh. A bik takin inchiu ṭhinte hian hriau thianghlim an mamawh a ni," a ti.

Consultation-a tarlan danin, sorkar laipuiin ram puma HIV/ AIDS titlem tur leh a bik takin a hluarna hmun bik India hmarchhak state-ahte hmalakna Project Sunrise chu kumin kum tir khan a tlangzarh a ni.