Tui lianin naupang 4 a la

Nimin tlai dar 2:45 vela ruahsur vanga tui lianin Armed Veng, Electric Veng leh Ram-thar Veng inrinaa Theihai luiah Ramthar Veng naupang pali a la a, he thu ziah lai hian pakhat chu thia hmuh a ni tawh.

Ramthar Veng khaw-tlang hruaitute aṭanga thu dawn danin, tlai dar 2:00 pelhah inbailemchhuan turin Theihai luiah naupang panga an kal a; luia an awm laiin tuilianin Danny Lalhriatpuia (11) s/o Lalpekhlua leh a nau Lalpekkima (4), Lalpekhluii (10) d/o Lallawmzuala leh Linda Lalhlimpuii (9) d/o Lalengtluanga te a la a, pakhat chu a inhai chhuak hman a ni.

Ramthar Veng leh ṭhenawm venga mite'n naupangte chu an zawng nghal a; Linda Lalhlimpuii chu tlai dar 5:45 velah Chite luia World Bank Road lei bulah thiin hmuh a ni. A ruang hi Ramthar Veng Local Council house-ah lak a nih hnuah a chhungte hnenah hlan a ni.

Naupang dang pathum zawng hian mi ṭhahnem tak an thawk chhuak a, he thu ziah lai thleng hian mi dang chu hmuh an la ni lo. Home minister R Lalzirliana chuan Ramthar Veng hi a tlawh nghal a ni.