Group A, B leh C ni turin Computer thiam a ngai

Department of Personal & Administrative Reforms (DPAR) chuan notification tichhuakin, 'Mizoram Group A, B leh C Service/Recruitment (Ammendment) Rules, 2016' hnuaiah group A, B leh C atana sorkar hnathawk lak thar turte'n computer an thiam tur a ni tih thu an tarlang.

DPAR notification tarlan danin, sorkar hnathawk, group A, B leh C (driver grage-III leh conductor grade-III tiam loin) atana lak turte chuan NIELIT aṭangin Course on Computer Concepts chin emaw, Mizoram State Council of Technical Education-in a pawmpui computer zirna aṭangin Diploma in Computer Application emaw, Certi-fi-cate in Computer Application certificate an nei tur a ni.

Group D aṭanga group C-a kaisang turte pawh (handyman aṭanga driver grade-III kai tur tel loin) April 1, 2017 aṭang chuan group A, B leh C lak thar turte'n computer lama thiamna an neih ang an neih a ngai tawh dawn a; group C-a kai sang tur hi hmun ruak a awm a, kum 50 a tlin tawh chuan ngaihnathiam tur an ni thung.