Software hmanin a mil loh avangin Kum 5 hnuai lamin Aadhaar ti thei lo

Sorkar laipuiin nau piang hlimte pawh Aadhaar card neihtir turin ti mah se, Mizoramah chuan a ziah luhnaa software-in a mil loh avangin kum 5 hnuai lam tan Aadhaar card siam theih a ni lo.

Kum nga hnuai lam tana Aadhaar card siam theih a nih loh chhan zawhna chhangin Aizawl DC office-a Aadhaar buai-puitute chuan, "Naupang kum ngai hnuai lam tan hian software hran a ngai a, tuna kan software hman hian a mil lo," an ti.

Aadhaar buaipuitute sawi danin, Aadhaar chung-changah hian Social Welfare department chu nodal department atan ruat an ni a, anni hian naupang kum 5 hnuai lamte'n Aadhaar Card an neih theihna atan ruahmanna an siam dawn a ni.

Sorkar laipui chuan nau piang hlim tan pawh Aadhaar-ah a inziah luh theih thu a tarlang a, mipuite chu an fate ziak lut turin an chah.

Sorkar laipui tarlan danin, Aadhaar ti tur hian kum nga hnuai lam tan chuan biometric tih a ngai lo a, an nu emaw pain Aadhaar card an neih a ngai thung. Hriat chian duh nei tan chuan anganwadi worker emaw, school headmaster zawhfiah tur a ni.

Hetih lai hian, Aizawl DC pisaa Aadhaar card siamna atana biometric enrolment siam hna chhunzawm zel a ni a, thawktute pawh veng hrang hrangah kal kualin an buaipui mek bawk.

Thu dawn danin, bio-metric enrolment centre hi 20 vel hawn a ni a, ni tin khaihlak loin inziak lut tura intlar an awm reng a, centre pakhatah a tlangpuiin ni khatah mi 40 vel an chhinchhiah hman a ni.