KHAWTHLIR

Sorkar leh HPC(D)

Mizoram sorkar leh HPC(D) palaite chu vawiin hian State Guest House-ah an inbe leh dawn a; chawhma dar 11-ah ṭan a ni ang. Mizoram sorkar aiawh mi pangate chu Home additional secretary Lalbiakzama'n a ho dawn a; HPC(D) aiawh mi parukte chu Lalṭha­liana'n a ho dawn a ni.

Chief Justice

Gauhati High Court Chief Justice, Ajit Singh chuan vawiin hian Lunglei a tlawh dawn a; September 22, 2016-a Zohnuai mipuiin Lunglei District Court building leh magistrate quarters an khawihte a hmunah a enfiah ang.

Thisen pe

Synod Multipurpose Training Centre, Mission Vengthlanga zirlaite chuan nimin khan SMTC din champha vawi 20-na pualin Synod Hospital tan thisen unit 16 an pe a, petute mipa 14 leh hmeichhia pahnih an ni.

Wildlife Week

Environment, Forests and Climate Change department bultumin October 2 aṭang khan kawng hrang hrangin Wildlife Week hman a ni a, October 8-ah khâr a ni ang. Week pual hian tukin zing dar 6:30 hian Wildlife Run buatsaih a ni dawn a, Kulikawn aṭanga Lammual thleng tlân tur a ni.

Hnathawh endik

Mizoram Legislative Assembly hnuaia Committee on Local Fund Accounts (COLFA) chuan, nimin khan Aizawl Municipal Council ward 18-na leh 19-na huam chhunga veng hrang hrang an tlawh a; 13th Finance Commission Grant, 2013- 2014 hnuaia hnathawh hrang hrangte an endik.

Organic zirho

Mission Organic Value Chain Development (MOVCD) for North Eastern States bultumin nimin khan Aijal Club-ah National Programme for Organic Production an buatsaih. Agriculture department hian kumin chhungin Mizoramah aieng leh Mizo hmarchate (Bird’s Eye Chilli) beihpui a thlak dawn a, hemi atan hian ram 2730 Hectare a zau buatsaih
ṭan tawh a ni.