Mizoramah SpiceJet a thlawk tan ta

Nimin aṭang khan Spicejet thlwhtheihna chuan Mizoram a rawn thlun zawm ve ta a, Lengpui Airport-ah Governor Lt.Gen. Nirbhay Sharma-a'n a hawng. SpiceJet thlawhtheihna hi ni tin Kolkata leh Guwahati aṭangin an rawn ṭum ang a, khawpui pahnih pan hian a thlawk chhuak ṭhin dawn a ni.

Lengpui Airport-a SpiceJet flight hawnna inkhawm hi SpiceJet senior vice president (Commercial) Shilpa Bhatia-i'n a kaihruai a; Governor chuan, SpiceJet-in Mizorama kawng thar an hawng chu lawmawm a tih thu sawiin, "Hmarchhak hi a pawimawh chho dawn a, tunah chuan Act East hi India thupui pawimawh a ni tawh. Act East-ah chuan Asia chhimchhak ramte nena inkalpawh tawnna a ngai a, inkalpawhna kawngah hian lei, tui leh boruaka inkalpawhna a pawimawh a ni," a ti.

Larsap chuan, insumdawn tawnna lamah Asia chhimchhak ramte nena hma lakho a nih dawn chuan India ram lailli aṭang pawhin hmarchhak state-te chu paltlang a ngaih dawn thu a sawi a, "Hengte avang hian India hmarchhak tihhmasawn hi hmalakna pawimawh tak a ni a, bungraw phurhte leh mihring phurhna atana SpiceJet-in hma an la hi ka lawm hle a ni," a ti.

Lengpui Airport-a thuthar thehdarhtute nen an inkawmnaah SpiceJet hotu Shilpa Bhatia chuan, "Aizawl, Guwahati leh Silchar aṭangtea direct flight kan ṭan hian hmarchhak leh ram chhung hmun dang inthlun zawm kan ngaih pawimawhzia a lang a. Aizawl hi khawpui pawimawh, khualzinte hîpna nei ṭha tak a nih laiin air connectivity a nei ṭha lo a, Aizawl flight route kan hawn hian Mizoram mipuite mamawh nasa taka a phuhrûk kan ring," a ti a; khualzinte'n chhuanna turah duh thlan tur tam zawk an neih dawn thu a sawi.

Spicejet hian Aizawl/Lengpui hi khawpui an thlun zawm 44-na a ni a, chungte chu India rama khawpui 38 leh ram pawna khawpui parukte an ni. Ni tin flight 317 an nei ṭhin a; Boeing 737NG thlawhna 29 leh Bombardier Q-400 thlawhna 14 an thlawhtir mek a ni. Aizawl bikah hian Q400 a thlawk dawn a, passenger 78 a phur a ni.