Aizawlah Hindi pawimawhna zirho

Principal Institute of Indian Language of Literature (PIILL), New Delhi leh Aizawla CE Jeeni te chuan Nagri Lepi Parishad, New Delhi bultumin nimin khan IPR Auditorium-ah 'Importance of national language' tih thupui zirhona an buatsaih a, minister hlui Dr R Lalthangliana khuallian a ni.

Dr R Lalthangliana chuan, Mizote zinga Hindi zirna lama professor hmasa ber Chawngthu Engineer Jeeni leh a thurualpuite'n seminar an buatsaih chu lawm-awm a tih thu a sawi a; "Hindi a pawimawhzia hre chiang vein ka inhria. Minister kum 10 kan nih ve laiin Central lamah meeting pawimawhah kan tel a, sap ṭawng leh Hindi chawhpawlh, a zatve Hindi-te hmanna a tam ṭhin. Hindi thiam tan chuan thil tih a nuam bik em em ṭhin," a ti.

R Lalthangliana chuan, School Education Minister a nih laiin Mizorama Hindi zirna chu primary school-ah kalpui a duh vang leh zirna bulṭhut aṭanga naupangin an zir a pawimawh a tih avangin Central-ah hma a lak thu sawiin, "Primary Hindi teacher 1,187 lai min pe ta mai a, chu chuan P/S zawng zawng a huap a ni," a ti a; chung mite chu tun hnua bàn leh vek an ni chu pawi a tih thu a sawi.

Prof. CE Jeeni chuan, khawvel ram 41-ah Hindi hmang an inzâr pharh thu sawiin, ram dangah Hindi zirna 21 chuang a awm tawh thu a sawi a, chu'ng ramahte chuan Hindi chanchinbu tih-chhuah a nih thu sawiin, "Hindi subject bik zirna university pawh a awm tawh a ni," a ti. Hindi chu national language-a puan hran ngai loin a ni sa tih a sawi bawk.

Seminar-ah hian resource person pathum - Mizoram University Hindi department HoD Prof. Shushil Kumar Sharma, Prof. Laltluangliana Khiangte leh Mizoram Hindi Training College principal Dr H Dengkimi ten thu an sawi a; college leh sikul hrang hrang aiawhte an tel a ni.