Mizoram Agro & Allied Products lakah FIR thehlut

Mizo Zirlai Pawl (MZP) general headquarters chuan, Mizoram Agro & Allied Products, Luangmual-in zirna an kalpui danah thil fel tâwk lo a awma an hriat
avangin nimin khan Zonuam Police Outpost-ah first information report (FIR) an thehlut.

FIR hi MZP general secretary L Ramdinliana Renthlei hminga thehluh a ni a, Zonuam police OC RS Lalchungnunga'n a lo dawngsawng.

Mizoram Agro & Allied Products neitu hi Solomon Vala s/o Lalhmingthanga a ni a; a zirlaite aṭangin course fee lak loh tur a tih laiin,
thla tin course fee a la ṭhin a, zirna a mumal loh bakah, course-a tel lo an zirpui ṭhin niin an tarlang.

MZP chuan, Mizoram Agro & Allied Pro-ducts chuan zirlai awm si loin, zirlai hming tam tak phuahchawpin sorkarah hamṭhatna a dil ṭhin nia sawiin, "Zirlaite hi certificate lem leh marksheet lemte an siamsak ṭhin," an ti.

Mizoram sorkara Labour, Employment and Industrial Training hnuaia registration nei a nih thu te, a course zinga mi ni lo Dialysis leh Panchakarma te zirtir a nih thu te, course fee thla tin Rs. 2,000 - 2500 a lak ṭhin thu te, kum 2012 aṭanga zir tawhte pawh tun thlengin certificate mumal an la pek loh thute an sawi bawk.

MZP hian Mizoram Agro & Allied Products chu sorkarin a registration tihtawpsak se an duh thu an sawi a; zirlaite aṭanga fee chi hrang hrang an lak tawhte chu zirlaite hnena pek kir leh vek an phût bawk a ni.