Rualbanlote chhawmdawlna zirho

Rehabilitation Council of India (RCI), RCI-NEZCC, NILD-NERC leh SCERT ṭangkawp chuan nimin khan SCERT Auditorium-ah ni hnih awh tur ‘Regional seminar on Capacity Building of Rehabilitation Professionals for Persons with Disabilities in NE States’ tih an buatsaih a; Governor Lt.Gen. Nirbhay Sharma-a'n a hmanpui.

Larsap chuan, rualbanlote chanvo pek, anmahni ṭanpui, chhawmdawl leh thiamna nei tura zirtir chu mi tin mawhphurhna leh thinlung tak zeta an thawh tur a ni tih sawiin, "India ramah mi maktaduai 70 chuangte chu pianphunga rualbanlohna hrang hrang neia hriat a ni a, RCI hmalaknain ram chhunga rualbanlote tan hamṭhatna chi hrang hrang ruahman zel a ni hi a vanneihthlak hle," a ti.

Hmarchhak bialah pianphunga rual-banlote tan hmalakna tur a la tam thu sawiin Governor chuan, "Mizoramah pawh hriselna lamah ṭan lak a ngai. Rualbanlote chu mi dangte aiin an nêp emaw an hniam emaw tia rilru pu tur an ni lo," a ti a; khawvelah rualbanlo eng emaw zat chu pianphunga mi pang-ngaite aia thleng thui leh hlawhtlinna sang zawk nei an awm thu a sawi.

RCI member-secretary SK Srivastava pawhin thu sawiin, "Ram pumah rualbanlote tana hamṭhatna tur rua-hmanna a tlem ṭhin hle. Sorkarin an hmasawnna a ngai pawimawh chho zel a, tunah chuan RCI kaltlangin Persons with Disabilities tan an mamawh ang milin programme 16 kalpui mek a ni," a ti.

Seminar-a tarlan danin, kum 1995 khan Parliament-in Persons with Disabilities (Equal Opportunities, protection of Rights and Full Participation) Act a pass a, kum 2000-ah rualbanlote mamawh phuhrûk lehzual theih nan tihdanglam leh a ni.