Sorkar leh HPC(D) inbe leh HPC(D)-te demand sawiho

Mizoram sorkar leh Hmar People Convention - Democrat (HPC-D) aiawhte chu nimin khan State Guest House-ah inremna zawngin an inbe leh a; HPC(D)-te'n phût an neih hrang hrangte an sawiho. Inbiaknain hma a sawn zela an hriat thu an sawi ve ve.

Inbiaknaah hian Mizoram sorkar aiawhte chu Home depart-ment-a additional secretary Lalbiakzama'n a kaihruai a; CID (SB) SP Rodingliana Chawngthu, Home joint secretary Lalhriatpuia leh OSD David H Lalthangliana te an tel a, HPC(D) aiawhte chu Lalṭhalien, Dr John Pulamte, David Buril, Lalthlamuana Hmar, Thangliensang leh Malsawma Darngawn te an ni.

Nimin tlaia an inbiak zawha Vanglaini palai zawhna chhangin Lalbiakzama chuan, boruak ṭha tak hnuaiah an inbiak thu a sawi a, "Hma kan sawnin kan hria a, inbiak leh hun tur erawh kan la ruat fel lo. Naktuk hian inbiak leh tum deuh a ni a, mahse, zanin hian thutlukna kan siam chauh ang," a ti.

Zawhna chhangin HPC(D) aiawhte hotu Lalṭhalien chuan, inbiaknain hma a sawn zel tih sawiin, "Kan lungrual viau chuan ka hria a, mahse, thil hi vawi leh khata tih zung zung theih a ni lo," a ti a; inbiakna chuan rah ṭha a chhuah ngei a beisei thu a sawi.

Lalṭhalien chuan, HPC(D)-te demand zingah autonomous district council pek tel mah se, sorkar tih theih loh chung chu nawr an tum lo tih a sawi a, "Inrem-na zawnga inbia kan nih angin, sorkar tih theih loh tur pui chu nawr kan tum lo. Sorkar lam pawhin hriatthiamna zau tak min nei a, kan inhrethiam tawn hle," a ti.

ADC chungchangah hian, Home minister R Lalzirliana chuan HPC(D)-te'n phût mah se, autonomous district council chu pek theih a nih loh thu a lo sawi tawh a ni.

Thu dawn danin, HPC(D)-te hian August 10, 2016-a Mizoram sorkar nena Tourist Lodge, Chaltlanga an inbiaknaa an thu dah angin, an inrâwnkhawm hnuah an thil phût leh duh dan hrang hrangte chu ziakin Mizoram sorkarah an thehlut a; chungte chu nimina an inbiak-naah ngaihtuah a ni.