Samkhuih Joint Operation YMA din

World Bank road (Aizawl by-pass road)-in a paltlang, Falkland Veng leh ITI Veng inkara veng paruk - Falkland Veng, Chite Veng, Bethlehem Veng, Bethlehem Veng-thlang, College Veng leh ITI Vengte chuan an huam chhung World Bank road-a thil sual tite laka beihpuithlakna turin Samkhuih Joint Operation YMA an din a; sual doin hma an la dawn tih an puang.

Samkhuih Joint Ope-ration YMA hian thuchhuah siamin, Falk-land Veng leh ITI Veng inkara World Bank road-ah ruihhlo chi hrang hrang a hluar hle tih sawiin, "Zu leh ruihhlo chi hrang hrangte zuar an awm reng bakah, ruih theih thil tihna hmun atan an hman reng avangin hun engemaw chen aṭang khan buaipui tham a ni tawh," an ti. Thil sual tihte chuan mipui nunphung pangngai a khawih pawi fo vang leh ruihhlo a hluar zel avangin September 23, 2016 zanah ruihhlo dona turin Samkhuih Joint Operation YMA an din tih an sawi.

Samkhuih Joint Operation YMA tarlan danin, Falkland Veng leh ITI Veng inkar World Bank road leh a chhehvelah zing, chhûn zàn zawmin an duty dawn a, ruihhlo ti emaw, zuar emaw, nunphung pangngai tirálṭi zawnga khawsa an awm chuan dimdawina tel loin hmalak an tum a ni.

Samkhuih Joint Ope-ration YMA chuan, an hmalakna tur chu sorkar leh Central YMA thawhhona thuthlung siam thláwp leh thawhpui chunga tih a nih thu an sawi a; an hmalakna chu thláwpa ṭawiawm turin mipui an ngen.