Tui lak naupang 4 zinga 3 hmuh tawh

October 4, 2016 tlai dar 2:45 vela ruahsur vanga tui lianin Armed Veng, Electric Veng leh Ramthar Veng inrìnaa Theihai luia Ramthar Veng naupang pali a len zinga pathum chu thiin hmuh an ni tawh.

Ramthar Veng khaw-tlang hruaitute aṭanga thu dawn danin, Thawhlehni tlai dar 5:45 vela Chite luia World Bank road lei bula Linda Lalhlimpuii (9) d/o Lalengtluanga ruang hmuh a nih hnuah, zan dar 1 velah World Bank road lei
aṭanga km. 3 vel hla, lui mawng lamah Danny Lalhriatpuia (11) s/o Lalpekhlua ruang hmuh a ni. Nimin chhun dar 12:15 vel khan Nghafuan luiah Lalpekhlui (10) d/o Lallawmzuala ruang hmuh a ni leh bawk.

Tarlan tawh angin, tui lian hian naupang pali a la a, Lalpekkimi (5) d/o Lalpekhlua chu he thu ziah lai thleng hian hmuh a la ni lo a, zawn mek zel ni. Ruang zawng hian Aizawl khawpui chhung leh khaw dang eng emaw zat aṭangin mi ṭhahnem tak an thawk chhuak a, hmun hrang hranga an inṭhen darh a ni.

Ramthar Veng leh ruang zawnna hmunah ram hruaitute an kal reng a; Thawhlehni zan leh nimin khan Home minister R Lalzirliana, Finance minister Lal-sawta, DMR minister C Ngunlianchunga, Govt. deputy chief whip RL Pianmawia, PC Zoram Sangliana, MLA leh bialtu councillor-te Lal-tlanzova Khiangte ten a tlawh a, thil ṭul ang ang an ngaihtuah. MHIP pawhin a ṭul apianga hman atan Ramthar Veng khawtlang hruaitute hnenah Rs. 3,000 an hlan.