KHAWTHLIR

Wildlife Run

National Wildlife Week vawi 62-na pualin nimin zing khan Environment, Forest & Climate Change department-in Wildlife Run an buatsaih. He hunah hian Kulikawn leh Chanmari aṭanga tlan ṭanin, Lammualah an intâwkkhawm a; Lammuala inkhawm tawi buatsaih chu Forest minister Lalrinmawia Ralte-in a hmanpui a ni.

HIV+ve 180 hmu

Kolasib District AIDS Prevention and Control Committee chu nimin khan Kolasib additional DC R Lalremsanga hoin DC conference hall-ah an ṭhukhawm a; January-September, 2016 chhungin Kolasib district-a thisen endik mi 5,017 zinga 180 chu HIV hrik pai an ni tih finfiah a a nih thu leh, HIV+ve zinga 12 chu nu nau pâi an nih thu an tarlang.

Luiah tla hlum

October 4, 2016 chhun dar 12 vel khan Tlawng luia Nghalchawm thir lei chhak suarah Lalṭanpuia (45), Manipur lam mi a tla hlum a, he thu ziah lai thleng hian a ruang hmuh a la ni lo. Thu dawn danin, Lalṭanpuia hian mau pûm hmangin Tlawng luiah thingzai a tawlh a, pûm chu a darh avangin a chesual a, tuiah a tla a ni.

Sangha humhalh

Ngopa Joint YMA chuan thuchhuah siamin, an khaw ram chhung lui leh khaw dang nena lui an inṭâwm Tuiphal luiah sangha fuan lai, October 1, 2016
aṭanga April 30, 2017 thlengin sangha man an khap thu an tarlang. Sangha man khapna hi a bawhchhetu ni lo a, sanghate venghimtu ni ṭheuh turin mi tin an ngen a ni.

Zanriah buatsaih

Aizawla chám mek Bangladesh minister Muhammad Nazrul Islam chu nizan khan chief minister Lal Thanhawla nen CM banglaah an inkâwm a, CM Lal Thanhawla'n zanriah a buatsaihsak nghal.