ARYA project hawn a ni

KVK, Hnahthial chuan scheme thar an kalpui tur, Attracting and Retaining Youth in Agriculture (ARYA) tih chu nimin khan Hnahthialah an hawng a; Lunglei district-a khaw hrang hranga self help group-te hnenah ar notê leh ar-in sakna tur sum an sem nghal.

ARYA project hi sorkar laipuiin hmarchhak state-a KVK 78 zinga KVK panga a thlante hnenah a pe a, thlan zingah KVK Hnahthial (Lunglei district) a tel. Project-in a tum ber chu, ṭhalai kum 35 chin eizawnna mumal nei lote'n eizawnna ngêlnghet an neih theihna tura ṭanpui a ni a; Lunglei district-a ṭhalai 200-te project hmang hian eizawnna ngêlnghet siamsak tum a ni.

ARYA hnuaiah hian component pali, ar vulh, vawk vulh, khuai khawi leh pâ (mushroom) khawite a awm. Nimina a hawnnaah hian animal science lama mithiam Dr C Lalremruata'n ṭanpuina dawng turte 'Management of Poultry (Rainbow Rooster)' tih thupui hmangin training a neihpui a ni.