BJP-in gas-a harsatna pawi an ti

BJP, Mizoram Pradesh chuan thuchhuah siamin, tunlaia eirawngbawlna gas harsat vanga chhungkaw tam takin buaina an tâwk chu pawi an tih thu an tarlang a; gas-a harsatna thlentu mi duhâm leh pamham ṭhen-
khatte thil tih dan chu tenawm an tih thu leh an dem thu an sawi.

Mizoram BJP chuan, gas harsatna thlentute chu a rang thei ang bera an thil tih dan ṭha lo bànsan a, mipuiin gas-a harsatna an neih chu a rang thei ang bera chinfel vat an phût thu an sawi a, "He thila inhnamhnawihte an phû tâwk hremna pek ngei a nih theih nana hma la tura Central YMA-in Mizoram sorkar an ngen ta hian ngaihtuahna a tithui a, Mizoram sorkar hian a tih tur lo nge, he thilah hian an filhlîm lo zawk tih hi kan zawt a ni," an ti.

BJP chuan, sorkar chu nawr kal reng ngai lo a, tlawmngai pawlte’n theihtawp an chhuah ṭhin anga Mizo mipui tan theihtawp chhuah ve turin Mizoram sorkar an ngen a; CYMA-in gas tihchingpen leh gas harsatna chungchang sorkar laipuia thlen an tum chu an thlawp thu an sawi bawk.