MZU-ah international seminar buatsaih mek

Nimin khan Mizoram University (MZU) auditorium-a MZU leh Research Centre for Eastern & North Eastern Regional Studies (CENERS-K) ten Act East Policy kalpuina tura Mizoram pawimawhna leh remchhannate zirhona international seminar, 'Mizoram, Gateway to South East Asia? What needs to be done?' tih an buatsaih.

Seminar hi Mizoram sorkar, Confederation of Indian Industry (CII) leh Numaligarh Refinery Limited (NRL)-te hriatpuinaa buatsaih a ni a; Union minister of state for External Affairs Gen.Dr VK Singh, chief minister Lal Thanhawla leh Bangladesh minister of state for Water Resources Muhammad Nazrul Islam ten an hmanpui.

Seminar hi vawiinah chhunzawm a ni dawn a, India ram palai lo ni ṭhin tawh te, ram dang palai ni ṭhin leh ni mek te, mithiam bikte leh hemi lama thawktu leh tawnhriat nei ṭha tak tak te, Nanyang Technological University hnuaia S Rajaratnam School of International Studies (RSIS) mithiamte leh MZU professor-te an tel a ni.

Gen. VK Singh

External Affairs minister Gen. VK Singh chuan, Kaladan Multi Modal Transit Transport Project chu sorkar laipuiin a ngai pawimawh a, a vil zui tih sawiin, "Hma tak leh kokim taka project zawh a nih thei nan sorkar laipuiin theihtawp a chhuah dawn a ni," a ti.

Gen. VK Singh chuan, Ministry of Surface Transport-in Mizoram leh Manipur-te chu inkawlpawhna leh rêl kawngah a ngai pawimawh nia sawiin, "A bik takin rel hmanga bungraw phurh a nih loh chuan insumdawn tawnnain awmzia a nei thui thei dawn lo a, heng ruhrel leh ruangamte hi chak taka kan din a ngai dawn," a ti. Act East Policy-ah inthlunzawmna leh inkawlpawhna chu a bika ngai pawimawh a nih tur thu leh, Myanmar kaltlanga Thailand leh Asia chhimchhak ramte pawh tur kawng sial turin hmalak mek a nih thu a sawi bawk.

Union Minister chuan, India-in Mizoram kaltlangin Bangladesh nena insumdawn tawn a duh thu sawiin, "Mizoramin tui chakna hmanga kawl-phetha siam chhuahna leh tourism-ah theihna a nei ṭha a, rural tourism-te ngaih pawimawh bik a ṭul a, tunlai khawvelah a firfiaka chete laka inven reng a ṭul bawk," a ti.

CM Lal Thanhawla

Chief minister Lal Thanhawla chuan kawng hrang hranga Mizoram dinhmun, hmasawnna a neih dan leh Mizoram Gross State Domestic Product (GSDP) ṭhan dante a sawi a; Mizoram chu state naupang tê ni chunga hmasawnna kawngah a phâk tâwka chaka a kal thu a sawi.

Lal Thanhawla chuan, Act East Policy hmangin hmarchhakah hmasawnna, a bikin ei leh bara hmasawnna chak leh zawka a thlen theih thu sawiin, "Hmarchhak state dangte aiin Mizoram hi ralmuan vang te, ram pahnihin an kárcheh vang leh remchanna dangte a neih avangin Look East Policy a taka a hlawhtlin nan dinhmun pawimawh tak a luah a ni," a ti.

Chief Minister chuan, ram chhung hmun dangte nen hmarchhak bial economy thlunzawm a harsa tih pawm a ngaih thu sawiin, "Harsatna leh chhan dang vangtein a harsa leh zual. Chuvangin, helai bial kawng tin renga hnufual khaichhuahna kawng awmchhun chu hmarchhak bial leh Asia chhimchhak ramte inthlunzawma insumdawn tawnna kawng hawn hi a ni," a ti bawk.

Bangladesh Minister

Keynote address sawitu Bangladesh Water Resources minister Muhammad Nazrul Islam chuan, hmarchhak bial chu Bangladesh sorkarin a ngaih pawimawh bik thu sawiin, "Hmarchhaka hmasawnna a awmin, ram pahnih kan ṭhang thei a, hei hian mipui tan hmasawnna kawng tam tak a hawn belh thei a ni," a ti.

Muhammad Nazrul Islam chuan, hmarchhak tan India ram chhung hmun dangte nena kawnga inthlunzawmna a harsat avangin Bangladesh a pawimawh tih sawiin, "Hemi atan hian Bangladesh sorkar a inhawng hle a ni," a ti a; tun hmaa lui dunga inkalpawhna awm
ṭhin chu tharthawh ṭul a tih thu a sawi. Chittagong Hill Tracts hawn zauh zel a nih thu te, Bangladesh-a Mizo khua Sazep chu ngaih pawimawh a duh dante a sawi bawk.