Sorkar leh HPC(D) inbe chhunzawm Inremna tur an ruahman tan

Mizoram sorkar leh Hmar People Convention-Democrat (HPC-D) aiawhte chu nimin khan Aizawla State Guest House-ah an inbe chhunzawm leh a; inremna tur hrang hrangte an ruahman ṭan nia thu dawn a ni.

Inbiaknaah hian Nilainia an inbiak ṭuma mite tho an tel leh a; Mizoram sorkar aiawhte chu Home additional secretary Lalbiakzama'n ho lehin, HPC(D) lam pawh Lalṭhalien-a'n a ho leh a ni. Thu dawn danin, inbiaknaah hian harsatna lian tham a awm lo a, ṭha takin an inbe thei.

Vanglaini palai zawhna chhangin Lalbiakzama chuan, "Inbiaknain hma a sawn zel a, kan lawm khawp mai. Vawiina kan inbiaknaah hian inremna atana pawimawh tur hrang hrangte kan ruahman ṭan a ni," a ti.

Lalbiakzama chuan, inbiak leh hun atan December thla an ruat thu sawiin, "Hemi hunah pawh hian inremna chu kan la ziah hman a beisei awm loh," a ti a; inremna ziak tak tak tur chuan tihfel ngai a tam thu a sawi.

Lalṭhalien pawhin Vanglaini palai zawhna chhangin, inbiaknaah sorkar leh anmahni an lawm tih sawiin, "Inremna atana act leh rules turte ruahman chhinin, inbiak leh hun atana pharh tura tih tur eng emaw zat a awm a ni," a ti.

Inbiak leh hunah inremna ziah hman a la beisei awm lo tih sawiin, Lalṭhalien chuan, "Ruahmanna hrang hrang kan siamte inbiak leh hunah pharh a ni ang," a ti a; ruahmanna hrang hrangte chu pawm tlân a nih chuan inbiak leh hunah inremna ziah theih a beisei thu a sawi.

Sorkar leh HPC(D) inbiak tawhna

Mizoram sorkar leh HPC(D) aiawhte hi July 18, 2013 khan Tourist Lodge, Chal-tlangah an inbe tawh a; hemi ṭum hian Mizoram sorkar aiawh mi pasarihte chu tuna Home addl. secretary Lalbiakzama'n a ho a, HPC (D) aiawh mi pasarihte chu working chairman Lalthangliana (LT Hmar)-in a ho thung.

Inbiaknaah hian HPC(D) lamin 6th Scheduled hnuaiah autonomous district council an ngiat a; inkahhaina, suspension of operation (SoO) chungchang an sawiho nghal a ni.

August 14, 2013-ah Mizoram sorkar leh HPC(D) aiawhte chu Tourist Lodge, Chaltlangah an inbe leh a; sorkar aiawhte chu LAD secretary B Lalhmingthanga'n a ho a, HPC(D) aiawhte chu working chairman Lalthangliana Hmar-in a ho. Hemi ṭum hian July 31, 2013-a tawp tawh Suspention of Operation (SoO) chungchang sawiho a ni. HPC(D) lamin September 2013 thleng pawhsei an rawt laiin, sorkar lamin thla ruk chhung pawhsei an duh a; duh dan a inah loh vangin an inrem thei lo a, SoO chu pawhsei a ni lo.

August 10, 2016-ah Tourist Lodge, Chaltlangah vek inbiak leh a ni a; thil chi hrang hrang sawiho ni mah se, thu mûm awm loin, September 2016 chhunga inbe leh turin thu an dah a ni.